რუსეთის თავდასხმის შედეგად დნეპრში 30 000 აბონენტი ელექტროენერგიის გარეშე დარჩა

რუსულმა ძალებმა დნეპრის კრიტიკულ ინფრასტრუქტურასა და ხარკოვის ოლქში მდებარე Naftogaz-ის გაზის მომპოვებელ ობიექტზე იერიში მიიტანეს.

არსებული ინფორმაციით, დნეპრზე თავდასხმა ადგილობრივი დროით დაახლოებით 13:30 საათზე განხორციელდა. დნეპროპეტროვსკის ოლქის გუბერნატორის, ოლექსანდრ ჰანჟას ცნობით, დარტყმების გამო სინელნიკოვესა და პავლოჰრადის რაიონებში, ასევე ქალაქ სამარში 30,000 აბონენტი ელექტროენერგიის გარეშე დარჩა. საყურადღებოა, რომ რეგიონის ხელმძღვანელს დაზიანებული კონკრეტული ობიექტი და ნგრევის მასშტაბი არ დაუკონკრეტებია.

რაც შეეხება ხარკოვის ოლქში Naftogaz-ის საწარმოო ობიექტის ერთ-ერთი დანადგარის დაზიანებას, მასაც რუსული დრონი მოხვდა. სახელმწიფო ენერგოკომპანიის განმარტებით, ადგილზე შექმნილი უსაფრთხოების რთული ვითარება მიყენებული ზიანის შეფასებას ამ დრომდე შეუძლებელს ხდის.

მნიშვნელოვანია ითქვას, რომ ბოლო იერიშები უკრაინის ენერგეტიკული ინფრასტრუქტურის წინააღმდეგ მიმართული ფართომასშტაბიანი კამპანიის ნაწილია. უკრაინის ენერგეტიკის სამინისტროს ინფორმაციით, თავდასხმის სამიზნე კიევის, ვოლინისა და ოდესის ოლქების ობიექტებიც გახდა.

მხოლოდ ვოლინის ოლქში ელექტროენერგიის გარეშე 5,000-ზე მეტი მომხმარებელი დარჩა. შექმნილი ვითარების გამო, უმსხვილესმა კერძო ენერგოკომპანია DTEK-მა კიევის ობოლონის, შევჩენკოსა და სვიატოშინოს რაიონებში ავარიული გათიშვები შემოიღო.

პარალელურად, Naftogaz-ის გენერალური დირექტორის მოვალეობის შემსრულებელმა სერჰი ფედორენკომ თქვა, რომ 2026 წლის დასაწყისიდან რუსეთმა კომპანიის ობიექტებზე 400-ზე მეტი დარტყმა განახორციელა. აღსანიშნავია, რომ ეს მაჩვენებელი გასული წლის ანალოგიურ პერიოდთან შედარებით გაორმაგებულია.