რუსეთის უდიდესი თამბაქოს მწარმოებელი სახელმწიფოს მართვაში გადავიდა - პუტინის გადაწყვეტილება Japan Tobacco-ს 7 კომპანიას შეეხო

რუსეთის პრეზიდენტმა ვლადიმერ პუტინმა გააფართოვა იმ კომპანიების სია, რომლებიც იაპონურ თამბაქოს გიგანტს, Japan Tobacco International-ს ჩამოართვა და დროებით მართვაში რუსულ მხარეს გადასცა. ხუთშაბათს ხელმოწერილ ბრძანებულებას პუტინმა კიდევ 3 კომპანია დაამატა.

შედეგად, JTI გახდა მორიგი მსხვილი უცხოური კომპანია, რომელმაც რუსეთში საკუთარ ბიზნესზე კონტროლი დაკარგა.

თავდაპირველი გადაწყვეტილებით, JTI-ის 4 კომპანიის წილები რუსულ კომპანია „ინდუსტრიულ აქტივებს“ გადაეცა. მოგვიანებით გამოქვეყნებული ახალი ბრძანებულებით კი ეს ზომა გავრცელდა კიდევ 3 ფირმაზე, რომლებიც JTI Investments Sarl-ს ეკუთვნოდა. სააგენტო „ინტერფაქსის“ ცნობით, ეს სამი კომპანია იმპორტს, ბიზნესის მართვასა და ჰოლდინგურ საქმიანობას უზრუნველყოფდა.

პუტინის ბრძანებაში არ არის განმარტებული, თუ რატომ ჩამოართვეს კომპანიებს აქტივები. თუმცა, წარსულში კრემლი მსგავს ნაბიჯებს იმ ქვეყნების საპასუხო ქმედებებით ამართლებდა, რომლებსაც რუსეთის მიმართ „არამეგობრულად“ მიიჩნევს.

რუსული მედია საშუალება RBC-ის ცნობით, „ინდუსტრიული აქტივების“ ხელმძღვანელმა ანტონ პივოვაროვმა განაცხადა, რომ კომპანია შეეცდება შეინარჩუნოს წარმოება, არ გაათავისუფლოს არსებული თანამშრომლები და შეუფერხებლად შეასრულოს ვალდებულებები პარტნიორების წინაშე.

თავად JTI-ში აცხადებენ, რომ იციან პუტინის გადაწყვეტილების შესახებ, აფასებენ შექმნილ სიტუაციასა და მოქმედების ვარიანტებს, ხოლო მათ მთავარ პრიორიტეტად თანამშრომლების ინტერესების დაცვა რჩება.

Japan Tobacco Inc.-ის აქციების დაახლოებით 37%-ს იაპონიის სახელმწიფო ფლობს. კომპანიის ცნობილ ბრენდებს შორის არის სიგარეტები Winston-ი და Camel-ი.

JTI რუსეთში თამბაქოს უდიდესი მწარმოებელია. რუსული ბიზნესი Japan Tobacco Group-ის საერთო შემოსავლის დაახლოებით 10%-ს და საოპერაციო მოგების თითქმის 25%-ს შეადგენს.