რუსეთში ყოველი მეხუთე ბანკი ზარალზეა

რუსეთში ზარალიანი ბანკების რაოდენობა მკვეთრად გაიზარდა, კერძოდ, თუ 2026 წლის 1 იანვრისთვის ქვეყანაში 34 ასეთი ფინანსური ინსტიტუტი ფიქსირდებოდა, ამჟამად ამ მაჩვენებელმა 60-ს მიაღწია.

ცენტრალური ბანკის მონაცემებით, ამჟამად ადგილობრივი საბანკო ბაზრის მონაწილეთა თითქმის მეხუთედი, ანუ 19.7%, ზარალზე მუშაობს. ექსპერტების შეფასებით, ეს არის ყველაზე მაღალი მაჩვენებელი 2022 წლის შემდეგ, როდესაც უკრაინაში შეჭრის გამო რუსეთს მასშტაბური სანქციები დაუწესდა.

ექსპერტების შეფასებით, შექმნილი ვითარება მკაცრი მონეტარული პოლიტიკის კუმულაციურ ეფექტს უკავშირდება. რეგულატორი რეფინანსირების განაკვეთს ნახევარ წელზე მეტი ხნის განმავლობაში რეკორდულ, 21%-იან ნიშნულზე ინარჩუნებდა, მისი ეტაპობრივი შემცირება კი მხოლოდ 2025 წლის ივნისში დაიწყო და ამჟამად განაკვეთი 14.5%-ს შეადგენს. ცენტრალური ბანკის განმარტებით, ზარალიანი ორგანიზაციების უმრავლესობას მცირე ბანკები შეადგენენ, რომელთა ჯამური წილი სექტორის აქტივებში 1%-ს არ აღემატება, თუმცა სააგენტო Expert RA-ს მონაცემებით, უარყოფითი ფინანსური შედეგები რამდენიმე მსხვილმა ორგანიზაციამაც აჩვენა.

რაც შეეხება პრობლემების კიდევ ერთ მიზეზს, საფრთხის წინაშე აღმოჩნდნენ ის ორგანიზაციებიც, რომლებიც ბიზნესსექტორს აქტიურად აკრედიტებდნენ, ვინაიდან კორპორაციული დეფოლტის მაჩვენებელმა კრიტიკულ ზღვარს მიაღწია. 2025 წლის მეოთხე კვარტალში ჩავარდნილი კორპორაციული სესხების წილმა 11%-ს გადააჭარბა, მაშინ როდესაც გასული წლის ანალოგიურ პერიოდში ეს მაჩვენებელი 5.8%-ს შეადგენდა.