„რუსთაველის რეაბილიტაციის შემდეგ კომერციული ქონება 30-40%-ით გაძვირდება“ - რეალტორი

რეაბილიტაციის შემდეგ რუსთაველის გამზირზე უძრავი ქონება გაძვირდება. როგორც „თბილისის კომერციული სივრცის“ დამფუძნებელმა რეზო მგალობლიშვილმა „საქმიანი დილის“ ეთერში განაცხადა, მოსალოდნელია კომერციული ქონების 30-40%-იანი გაძვირება.

ექსპერტები ვარაუდობენ, რომ განახლებული, უფრო მიმზიდველი გარემო ფეხით ნაკადის ზრდას, რაც ახალი ბრენდების შემოსვლას გამოიწვევს.

„რუსთაველის გამზირი თბილისის ერთ-ერთი მთავარი კულტურული, ტურისტული და სავაჭრო ქუჩაა, შესაბამისად, აქ კომერციული უძრავი ქონების ფასები პირდაპირ არის დაკავშირებული საფეხმავლო ნაკადთან. 4-თვიანი შეზღუდვა, რომელიც გადაადგილებასა და ბიზნესების ფუნქციონირებაზე გავლენას მოახდენს, სავარაუდოდ, პირდაპირ აისახება ფასებზე. მოკლევადიან პერიოდში მოსალოდნელია, რომ მესაკუთრეებსა და მოიჯარეებს შორის გაჩნდება გარკვეული შეღავათიანი პირობები და შესაძლოა საიჯარო ფასები დაახლოებით 20–25%-ით შემცირდეს. თუმცა, როდესაც სარეაბილიტაციო სამუშაოები დასრულდება, გამზირი უფრო მიმზიდველი გახდება როგორც ადგილობრივი, ისე უცხოელი ვიზიტორებისა და ფეხით მოსიარულეებისთვის. ეს გაზრდის ბრენდების ინტერესს, მოსალოდნელია დიდი კომპანიების, მაღალი კლასის რესტორნებისა და ახალი სავაჭრო ობიექტების შემოსვლა. ამის შედეგად, სავარაუდოა, რომ საიჯარო ფასები 30–40%-ით გაიზარდოს. მსგავსი მოლოდინი ეფუძნება ჭავჭავაძის გამზირის განვითარების გამოცდილებას.

თუ სარეაბილიტაციო სამუშაოები დაგეგმილ ვადებში დაახლოებით 4 თვეში დასრულდება, ბაზარი ამ დროებით შოკს შედარებით მარტივად გადაიტანს. თუმცა, თუ განმეორდება ვაკის მაგალითი, სადაც სამუშაოები დაგეგმილზე რამდენჯერმე დიდხანს გაგრძელდა, მდგომარეობა ბიზნესებისთვის მნიშვნელოვნად გართულდება.“ - განაცხადა მგალობლიშვილმა.

დღეს რუსთაველის გამზირზე კომერციული ფართების ფასები დამოკიდებულია ობიექტის ხილვადობაზე, მდებარეობასა და ფართის ზომაზე. საშუალო საიჯარო განაკვეთები კვადრატულ მეტრზე დაახლოებით 40–80$ ფარგლებში მერყეობს.