საფრანგეთი სკოლების, ბაგა-ბაღებისა და საბავშვო ცენტრების გასაგრილებლად €80 მილიონს გამოყოფს
საფრანგეთის სახელმწიფო ენერგეტიკული კომპანია Électricité de France სკოლების, ბაგა-ბაღებისა და საბავშვო ცენტრების გაგრილების სისტემებით აღჭურვისთვის 80 მილიონ ევროს დააბანდებს, იმ ფონზე, როდესაც ქვეყანა სულ უფრო მკაცრ სიცხის ტალღებს აწყდება.
გაგრილების სხვადასხვა საშუალების, მათ შორის ვენტილატორების, წყლის მფრქვეველი სისტემების, პორტატული და ფიქსირებული კონდიციონერების შეძენას, ასევე გრძელვადიან სტრუქტურულ მოდერნიზაციას გულისხმობს, სიცხის მომავალი ტალღებთან გასამკლავებლად.
"ვინაიდან სიცხის ტალღები გავლენას ახდენს ჩვენს ქვეყანაზე, გვსურდა გადაგვედგა კონკრეტული ნაბიჯები - დავხმარებოდით სკოლებს, ბაგა-ბაღებსა და დასასვენებელ ცენტრებს, რათა მათ როგორც სწრაფი გაგრილების საშუალებები, ისე მდგრადი ინფრასტრუქტურა ჰქონოდათ", - განაცხადა EDF-ის ხელმძღვანელმა ბერნარ ფონტანამ.
ფინანსების ნახევარი, 40 მილიონი ევრო მიმართული სწრაფი გამოყენების აღჭურვილობისკენ იქნება, როგორებიცაა ვენტილატორები, წყლის მფრქვეველი სისტემები და პორტატული კონდიციონერები (არაუმეტეს 10 ერთეულისა თითოეულ დაწესებულებაზე). დარჩენილი 40 მილიონი ევრო კი სტრუქტურულ გაუმჯობესებას, მათ შორის ორმხრივი მოქმედების თბურ ტუმბოებს მოხმარდება.
საფრანგეთი ექსტრემალურ სიცხეს ებრძვის, რომელიც სულ უფრო მეტად აფერხებს საზოგადოებრივი სექტორის მუშაობას, განსაკუთრებით განათლების სისტემაში, სადაც სკოლის საკლასო ოთახებში სასწავლო პროცესის შენარჩუნება პრობლემატური ხდება.
განათლების სფეროს პროფკავშირებმა გასულ კვირას პერსონალს მოუწოდეს, "საჭიროების შემთხვევაში გამოიყენონ გაფიცვის უფლება, რათა გააპროტესტონ სამუშაო პირობები და მათი გაუმჯობესება მოითხოვონ", იმ ფონზე, როდესაც ტემპერატურამ 30 გრადუსს გადააჭარბა, ხოლო ზოგიერთ რეგიონში 40 გრადუსსაც გასცდა.
"პერსონალი, პირდაპირი და გადატანითი მნიშვნელობით, ოფლს ღვრის საჯარო განათლების პროცესის შესანარჩუნებლად - მარტო და რთულ პირობებში", - ნათქვამია განათლების პროფკავშირების მიერ გავრცელებულ განცხადებაში.