სამხრეთ კორეამ აშშ-ში $350 მილიარდის ინვესტირების გეგმა დაამტკიცა

სამხრეთ კორეის მთავრობამ დაამტკიცა სპეციალური საპრეზიდენტო დეკრეტი, რომელიც გასულ წელს ვაშინგტონსა და სეულს შორის გაფორმებული სავაჭრო შეთანხმების ფარგლებში, ამერიკის შეერთებულ შტატებში $350 მილიარდის მოცულობის სტრატეგიული ინვესტიციის განხორციელებას ითვალისწინებს.

როგორც ირკვევა, მიღებული დოკუმენტი დეტალურად განსაზღვრავს საინვესტიციო გეგმის პირობებს, მათ შორის „კომერციული გონივრულობის“ ცნებას. ეს კრიტერიუმი საფუძვლად დაედება აშშ-ის სტრატეგიულ სამრეწველო სექტორებში $200 მილიარდის FDI-ის მიმართვას. ამასთან, სამხრეთ კორეამ, შეღავათიანი სატარიფო პირობების სანაცვლოდ, გემთმშენებლობის სფეროში თანამშრომლობისთვის $150 მილიარდის გამოყოფის ვალდებულებაც აიღო.

არსებული ინფორმაციით, სეული კომერციულად გონივრულად მიიჩნევს იმ პროექტს, რომელსაც განსაზღვრულ პერიოდში საწყისი საინვესტიციო კაპიტალის და დარიცხული პროცენტების სრულად დასაფარად საკმარისი შემოსავლის გენერირება შეუძლია.

სამთავრობო განცხადებაში აღნიშნულია, რომ თითოეული პროექტის მუშაობის გახანგრძლივება და კონკრეტული ვადები ვაშინგტონთან მოლაპარაკებების შედეგად განისაზღვრება. პარალელურად, ქვეყნის ხელისუფლება სახელმწიფოს მიერ მხარდაჭერილი სპეციალური საინვესტიციო კორპორაციის შექმნას გეგმავს, რომლის საქმიანობის გახანგრძლივებაც 20 წლით არის გათვალისწინებული.

რაც შეეხება ამ გადაწყვეტილების წინაპირობას, სამხრეთ კორეამ საინვესტიციო გეგმის განხორციელების პირობა ვაშინგტონთან გაფორმებული ხელშეკრულებით დადო, რაც ამერიკულ ბაზარზე კორეულ პროდუქციაზე, მათ შორის ავტომობილებზე, ტარიფების შემცირებას ისახავს მიზნად.

შეგახსენებთ, რომ მიმდინარე წლის იანვარში პრეზიდენტი დონალდ ტრამპი სამხრეთ კორეიდან იმპორტირებულ საქონელზე ტარიფების 25%-მდე გაზრდით იმუქრებოდა და აცხადებდა, რომ სეულის საკანონმდებლო ორგანოს სავაჭრო ხელშეკრულება, რომელიც ამერიკულ მოსაკრებელს 15%-იან ნიშნულზე ზღუდავდა, ჯერ კიდევ არ ჰქონდა მიღებული. ამის საპასუხოდ, ქვეყნის ეროვნულმა ასამბლეამ საინვესტიციო გეგმის შესახებ სპეციალური კანონპროექტი ორპარტიული მხარდაჭერით მარტის პლენარულ სესიაზე დაჩქარებული წესით დაამტკიცა.