Samsung-ის საბაზრო კაპიტალიზაციამ $1 ტრილიონს გადააჭარბა

სამხრეთკორეული ტექნოლოგიური გიგანტის, Samsung-ის საბაზრო შეფასებამ ოთხშაბათს $1 ტრილიონიან ნიშნულს გადააჭარბა. ამ მაჩვენებლით ის აზიაში რიგით მეორე კომპანია გახდა, რომელმაც აღნიშნულ ისტორიულ ზღვარს მიაღწია.

ამ დრომდე მსგავსი შედეგის დაფიქსირება მხოლოდ ტაივანურმა TSMC-მ შეძლო. სეულის საფონდო ბირჟაზე ვაჭრობის დაწყებისას კომპანიის კაპიტალიზაციამ 1,500 ტრილიონი ვონი ($1.03 ტრილიონი) შეადგინა.

როგორც ირკვევა, აქციების ფასის მკვეთრი ზრდა ამერიკის შეერთებულ შტატებში ხელოვნურ ინტელექტზე მომუშავე კომპანიების ფასიანი ქაღალდების ღირებულების მატებამ განაპირობა. არსებული ინფორმაციით, ინვესტორების განწყობაზე Intel-ისა და სხვა ტექნოლოგიური გიგანტების ძლიერმა კვარტალურმა ანგარიშებმა იმოქმედა. პარალელურად, პოზიტიური მოლოდინები აშშ-სა და ირანს შორის საბრძოლო მოქმედებების შეჩერებამაც გააძლიერა. ამავე ფაქტორმა განაპირობა ის, რომ გასული სავაჭრო სესია S&P 500-ისა და Nasdaq-ის ინდექსებისთვის რეკორდული მაჩვენებლების მიღწევით დაიხურა.

საფონდო ბაზარზე დაფიქსირებული ტენდენცია შეეხო Samsung-საც, რომლის აქციების ფასიც 12%-ით გაიზარდა. აღსანიშნავია, რომ ეს მაჩვენებელი მნიშვნელოვნად აჭარბებს ბენჩმარკ Kospi-ს 5.4%-იან ნამატს. ცნობისთვის, ტექნოლოგიური სექტორის მიმართ გაზრდილი ინტერესი უშუალოდ გლობალურ ბაზარზე AI ჩიპების მიმართ მოთხოვნისა და რეალიზაციის მკვეთრ მატებას უკავშირდება.

შეგახსენებთ, რომ Samsung Electronics-ი მეხსიერების ბარათების მსოფლიოში უმსხვილესი მწარმოებელია. კომპანია გლობალურ ბაზარზე ნახევარგამტარების სექტორში წამყვან პოზიციას წლებია ინარჩუნებს.