საქართველო ევროპასთან 7 ქვეყანას აკავშირებს... მაქსიმალურად ვცდილობთ ამ შესაძლებლობის ათვისებას - კობახიძე
ირაკლი კობახიძის განცხადებით, ქვეყნის მიზანია „შუა დერეფნის“ ფარგლებში საკუთარი როლის მაქსიმალური გაზრდა, რადგან საქართველო შავ ზღვასა და ევროპასთან 7 ზღვაზე გასასვლელის არმქონე ქვეყანას აკავშირებს.
ამის შესახებ კობახიძემ ერევანში, ევროპული პოლიტიკური გაერთიანების მე-8 სამიტის ფარგლებში, ჟურნალისტებთან ისაუბრა.
„საქართველო არის ქვეყანა, რომელიც შავ ზღვასთან და, შესაბამისად, ევროპასთან, დასავლეთთან აკავშირებს 7 ქვეყანას, რომელსაც არ აქვს ზღვაზე გასასვლელი — ეს არის ჩვენი მეზობელი ქვეყნები, სომხეთი და აზერბაიჯანი, შუა აზიის ქვეყნები. რა თქმა უნდა, ეს ზრდის ჩვენს როლს დაკავშირებადობის კუთხით და მაქსიმალურად ვცდილობთ, რომ ეს შესაძლებლობა ავითვისოთ“.
კობახიძემ რეგიონში არსებულ გეოპოლიტიკურ ვითარებასა და უსაფრთხოების გამოწვევებზეც გაამახვილა ყურადღება. მისი თქმით, სამხრეთ კავკასია ამჟამად ორ სამხედრო კონფლიქტს უკრაინაში მიმდინარე ომსა და ახლო აღმოსავლეთში არსებულ კრიზისს შორის არის მოქცეული.
პრემიერ-მინისტრის თქმით, სამიტის ფარგლებში გამართულ მრგვალი მაგიდის დისკუსიაზე მან კოლეგებს ინფორმაცია მიაწოდა იმ ინვესტიციების შესახებ, რომლებიც საქართველოში ინფრასტრუქტურის მიმართულებით ხორციელდება.
„შუა დერეფნის“ როლის გაძლიერების გარდა, კობახიძემ ხაზი გაუსვა ენერგეტიკული დამოუკიდებლობის საკითხსაც და აღნიშნა, რომ საქართველოს მთავრობის მიზანია ელექტროენერგიის გენერაციის მნიშვნელოვანი ზრდა. გენერაციის გაზრდა 4 800 მეგავატიდან 11 500 მეგავატამდე.
ქვეყნის სრული ენერგეტიკული თვითკმარობა და ელექტროენერგიის ექსპორტზე გატანა.
ამ კონტექსტში კობახიძემ განსაკუთრებული ყურადღება გაამახვილა შავი ზღვის წყალქვეშა კაბელის პროექტზე, რომელიც ევროპასთან ენერგეტიკულ დაკავშირებადობას ისახავს მიზნად.