საქართველოს დემოკრატიული უკუსვლა და ოპოზიციისა და სამოქალაქო საზოგადოების შევიწროება გრძელდება - PACE-ს კომიტეტი

ევროპის საბჭოს საპარლამენტო ასამბლეის (PACE) მონიტორინგის კომიტეტი სერიოზულ შეშფოთებას გამოხატავს საქართველოში დემოკრატიული ჩამოშლისა და ღრმა პოლიტიკურ-სოციალური კრიზისის შესახებ.

ისინი აღნიშნავენ, რომ დემოკრატიული უკუსვლა გრძელდება, ისევე როგორც სამოქალაქო საზოგადოების, პოლიტიკური ოპოზიციისა და განსხვავებული აზრის მიმართ ზეწოლა.

კომიტეტი თანამომხსენებლების ედიტ ესტრელასა და საბინა ჩუდიჩის ანგარიშის საფუძველზე მომზადებულ რეზოლუციის პროექტში სინანულს გამოთქვამს, რომ ასამბლეის არცერთი რეკომენდაცია არ არის გათვალისწინებული და აცხადებს, რომ დემოკრატიის მუდმივი რღვევა „სერიოზულ ეჭვებს ბადებს ხელისუფლების მზაობასთან დაკავშირებით, შეასრულოს საქართველოს, როგორც ევროპის საბჭოს წევრის ვალდებულებები.

კომიტეტმა ხაზგასმით აღნიშნა, რომ „ევროპის საბჭოს წევრობა პრივილეგიაა, რომელიც უფლებებსა და ვალდებულებებს მოჰყვება“ და რომ ორგანიზაციის პრინციპები და სტანდარტები არ შეიძლება ეჭვქვეშ დადგეს.

კომიტეტმა „მიუღებლად“ შეაფასა ინიციატივა, რომელიც „საქართველოში პრაქტიკულად ყველა დემოკრატიული ოპოზიციური პარტიის აკრძალვას და მათი ხელმძღვანელობის სისხლისსამართლებრივ დევნას ითვალისწინებს პოლიტიკურად მოტივირებული ბრალდებებით. კომიტეტი აღნიშნავს, რომ თუ ეს ქმედება გაგრძელდება, ეს საქართველოში ფაქტობრივად ერთპარტიულ დიქტატურას დაამყარებს.

პარლამენტარებმა ასევე აღნიშნეს, რომ „საქართველოში ამჟამად არ არსებობს ჭეშმარიტად დემოკრატიული არჩევნების ჩატარების პირობები“ „დემოკრატიული ოპოზიციის, სამოქალაქო საზოგადოებისა და დამოუკიდებელი მედიის დაუნდობელი შევიწროების, ასევე ქვეყანაში არსებული უკიდურესი სოციალური და პოლიტიკური პოლარიზაციის“ გამო.

რეზოლუციის პროექტი ასევე მოითხოვს „რეპრესიული კანონმდებლობის“ გაუქმებას, მათ შორის სისხლის სამართლის კოდექსში, მოქალაქეთა პოლიტიკური გაერთიანებების შესახებ კანონსა და ადმინისტრაციულ სამართალდარღვევათა კოდექსში შეტანილი ცვლილებების. ასევე გმობს სამოქალაქო საზოგადოების ორგანიზაციებზე, მათ ხელმძღვანელობასა და დამოუკიდებელ მედიაზე განგრძობად თავდასხმას.

კომიტეტმა ასევე წუხილი გამოთქვა იმის გამო, რომ „არ ჩატარებულა სანდო გამოძიება პოლიციის სისასტიკესა და დემონსტრაციების დროს ჩადენილ სხვა ადამიანის უფლებების დარღვევებთან დაკავშირებით“ და განსაკუთრებული შეშფოთება გამოთქვა „თბილისში საპროტესტო აქციის დასაშლელად აკრძალული ქიმიური ნივთიერებების გამოყენების შესახებ ინფორმაციის“ გამო.

ასამბლეა მოუწოდებს საქართველოს ხელისუფლებას, სრულად შეასრულოს ადამიანის უფლებათა ევროპული სასამართლოს გადაწყვეტილებები და ეუთოს მოსკოვის მექანიზმის ფარგლებში გაცემული რეკომენდაციები, რომლებიც ემთხვევა ამ და წინა რეზოლუციებს საქართველოში დემოკრატიული უკუქცევის შესახებ.