საქართველოს მოსახლეობა 3.9 მილიონი ადამიანია, 134 000 უცხოეთის მოქალაქეა - საქსტატი

საქსტატი საქართველოს მოსახლეობის აღწერასთან დეტალურ ინფორმაციას აქვეყნებს. საქსტატის თანახმად, საქართველოს მოსახლეობა 2024 წლის აღწერის თანახმად არის 3,929,581 ადამიანი. ამასთან, საქსტატი აქვეყნებს დეტალურ ინფორმაციას აღწერაში შესული უცხოეთის მოქალაქეების შესახებ, დღეს გამოქვეყნებული ანგარიშის თანახმად, მოსახლეობის მთლიან რაოდენობაში 3.4%, ანუ 133,857 ადამიანი არის უცხოეთის მოქალაქე, რომელიც მუდმივად ცხოვრობს საქართველოში, ხოლო მოსახლეობის 0.5%-ის მოქალაქეობა კი არ არის იდენტიფიცირებული.

შესაბამისად, საქართველოს მოსახლეობის აღწერის თანახმად, საქართველოს მოქალაქე 3,795,724 ადამიანია. მნიშვნელოვანია გარემოება, რომ საქსტატმა მოსახლეობის აღწერის პირველადი მონაცემები, რაც 2025 წლის აგვისტოში გამოაქვეყნა, მიუთითა რომ მოსახლეობის მთლიანი რაოდენობა იყო 3,914,000 ადამიანი, ხოლო უცხოელთა წილი კი 6.6%-ს ანუ 257,000-ს შეადგენდა. თუმცა, განახლებული მონაცემებით დაზუსტდა უცხოელთა რაოდენობა და ის 133 857-მდე შემცირდა, რაც სავარაუდოდ, დაკავშირებულია უცხოელთა საქართველოში დაყოვნების მოთხოვნებთან, რაც სტატისტიკური მეთოდოლოგიის თანახმად 12 თვეს უნდა აღემატებოდეს.

ამასთან, საქსტატმა გამოაქვეყნა ინფორმაცია თუ რომელი ქვეყნის მოქალაქეები არიან აღრიცხული საქართველოს მოსახლეობის მთლიან შემადგენლობაში:

• რუსეთის მოქალაქე - 37,715 ადამიანი; • ინდოეთის მოქალაქე - 23,925 ადამიანი; • უკრაინის მოქალაქე - 11,542 ადამიანი; • აზერბაიჯანის მოქალაქე - 8,309 ადამიანი; • სომხეთის მოქალაქე - 5,381 ადამიანი; • თურქეთის მოქალაქე - 5,262 ადამიანი; • ბელარუსის მოქალაქე - 4,473 ადამიანი; • ირანის მოქალაქე - 4,322 ადამიანი; • ისრაელის მოქალაქე - 3,244 ადამიანი; • იორდანიის მოქალაქე - 3,037 ადამიანი.

საქართველოს მოსახლეობის აღწერის მიზანია ქვეყანაში მცხოვრები ადამიანების რაოდენობის დადგენა, შესაბამისად მასში შედიან როგორც საქართველოს მოქალაქეები, ასევე უცხოეთის მოქალაქეებიც, რომლებიც ქვეყანაში მუდმივად ცხოვრობენ.