საქართველოს მთლიანი საგარეო ვალი $27 მილიარდამდე გაიზარდა

საქართველოს ეროვნული ბანკის მონაცემებით, 2026 წლის 31 მარტის მდგომარეობით, ქვეყნის მთლიანი საგარეო ვალი 27.1 მილიარდ აშშ დოლარს შეადგენს, რაც ბოლო ოთხი კვარტალის მთლიანი შიდა პროდუქტის (მშპ) 68.7%-ის ტოლია. ერთი წლის განმავლობაში საგარეო ვალი 1.6 მილიარდი აშშ დოლარით, ანუ 6.3%-ით გაიზარდა - 2025 წლის პირველი კვარტლის ბოლოს ეს მაჩვენებელი 25.5 მილიარდ დოლარს შეადგენდა.

მთლიანი საგარეო ვალის სტრუქტურიდან 11.6 მილიარდი აშშ დოლარი სახელმწიფო სექტორზე მოდის, ხოლო კერძო სექტორის საგარეო ვალდებულებები 15.5 მილიარდ აშშ დოლარს აღწევს. კერძო სექტორის ვალის შემადგენლობაში შედის საბანკო სექტორის, სხვა სექტორებისა და კომპანიათაშორისი ვალდებულებები.

2026 წლის პირველი კვარტლის მონაცემებით, სახელმწიფო საგარეო ვალი 11.6 მილიარდი აშშ დოლარია, რაც 2025 წლის ანალოგიურ პერიოდთან შედარებით 600 მილიონი დოლარით, ანუ 5.5%-ით მეტია. აქედან, ცენტრალური მთავრობის საგარეო ვალდებულებები 9.1 მილიარდ დოლარს შეადგენს, რაც წინა წელთან შედარებით 7.1%-ითაა გაზრდილი. ეროვნული ბანკის ვალდებულებები 772.8 მილიონ დოლარს შეადგენს, რაც 6.1%-ით ნაკლებია 2025 წლის პირველ კვარტალთან შედარებით. სახელმწიფო საწარმოების გამოშვებული ობლიგაციები 7.3%-ით გაიზარდა და 481.8 მილიონ დოლარს მიაღწია, ხოლო სახელმწიფო საწარმოების სესხები დაახლოებით 1.2 მილიარდ დოლარზე უცვლელი დარჩა.

კერძო სექტორის საგარეო ვალდებულებები, ჯამში, 15.5 მილიარდ დოლარს შეადგენს, რაც წინა წლის 14.5 მილიარდ დოლართან შედარებით 7.0%-იანი ზრდაა. მათ შორის, საბანკო სექტორის საგარეო ვალი 9.8 მილიარდ დოლარია, რაც 13.9%-ით აღემატება 2025 წლის პირველ კვარტლის მაჩვენებელს. სხვა სექტორების საგარეო ვალი 5.0 მილიარდ დოლარს შეადგენს, რაც დაახლოებით 2.0%-ით გაიზარდა, ხოლო კომპანიათაშორისი ვალი 2.5 მილიარდ დოლარამდე შემცირდა, რაც 7.4%-იან კლებას წარმოადგენს.

ეროვნული ბანკის ინფორმაციით, 2026 წლის პირველ კვარტალში საქართველოს მთლიანი საგარეო ვალი წინა კვარტალთან შედარებით 252.9 მილიონი აშშ დოლარით გაიზარდა. ზრდიდან 574.0 მილიონი დოლარი ოპერაციულმა ცვლილებებმა განაპირობა, ხოლო საკურსო ცვლილებების შედეგად ვალი 257.1 მილიონი დოლარით შემცირდა. შესაბამისად, ჯამური ზრდა წინა კვარტალთან მიმართებით 252.9 მილიონ დოლარს შეადგენდა.

სტატისტიკის მიხედვით, 2026 წლის 31 მარტის მდგომარეობით, საქართველოს მთლიანი საგარეო ვალის 85.6% უცხოურ ვალუტაშია დენომინირებული, მაშინ როდესაც 2025 წლის ანალოგიურ პერიოდში ეს მაჩვენებელი 88.6% იყო.