"საშუალებას გვაძლევს, ბიუჯეტს შევხედოთ კომპლექსურად" - პარლამენტმა ბიუჯეტის აუდიტის ანგარიში განიხილა

პარლამენტის საფინანსო-საბიუჯეტო კომიტეტთან არსებულმა სახელმწიფო აუდიტის სამსახურის ანგარიშების განმხილველმა მუდმივმოქმედმა აუდიტის ჯგუფმა სახელმწიფო საბიუჯეტო ორგანიზაციების 2024 და 2025 წლების კონსოლიდირებული ფინანსური ანგარიშგების ფინანსური აუდიტების შედეგები განიხილა.

როგორც კომიტეტის თავმჯდომარემ და აუდიტის ჯგუფის ხელმძღვანელმა პაატა კვიჟინაძემ აღნიშნა, აუდიტის სამსახურმა მსგავსი ტიპის კონსოლიდირებული ანგარიში პირველად მოამზადა, რაც მანამდე არსებული ინდივიდუალური უწყებრივი აუდიტებისგან განსხვავებით, ევროპის საუკეთესო პრაქტიკას წარმოადგენს.

„ჩვენ დღემდე შესაბამისობის, ფინანსურ და ეფექტიანობის აუდიტებს ვიხილავდით. ახლა დაგვემატა სახელმწიფო ბიუჯეტის კონსოლიდირებული აუდიტის ანგარიშის განხილვა. ეს პროცესი საშუალებას გვაძლევს, ბიუჯეტს შევხედოთ კომპლექსურად, გვქონდეს სრული სურათი ბიუჯეტის მართვის ზოგად ტენდენციებსა და რეალურ მდგომარეობაზე. აღნიშნული პრაქტიკა მნიშვნელოვნად შეუწყობს ხელს საერთაშორისო რეიტინგების გაუმჯობესებას“, - განაცხადა კვიჟინაძემ.

სახელმწიფო აუდიტის სამსახურის საერთო დანიშნულების სახელმწიფო მომსახურების სფეროს აუდიტის დეპარტამენტის უფროსმა, გიორგი კეკელიშვილმა შეხვედრაზე განმარტა, რომ ფინანსური აუდიტი ძირითადად მოიცავდა ბუღალტრული აღრიცხვისა და ფინანსური ანგარიშგების საკითხებს, ასევე შიდა კონტროლის გარემოს შეფასებას.

მისი თქმით, ჩატარებული აუდიტის შედეგად გაიცა მოდიფიცირებული მოსაზრებები. მიგნებები 10 სამინისტროსა და მათ დაქვემდებარებულ საბიუჯეტო ორგანიზაციებს ეხება და ოთხ ძირითად მიმართულებას მოიცავს:

• ფინანსური აქტივები და ვალდებულებები - მათ შორის, ისეთი აქტივები და ვალდებულებები, რომელთა სისწორესა და შეფასებაზე რწმუნება ვერ იქნა მიღებული, აგრეთვე სახელმწიფო საწარმოებში არსებული წილების აღრიცხვის ხარვეზები; • არაფინანსური აქტივები - მათ შორის აღურიცხავი არაფინანსური აქტივები; • შემოსავლები და ხარჯები - აღრიცხვის პროცესში გამოვლენილი ხარვეზები; • ზოგადი კონტროლის მექანიზმები.

აუდიტის შედეგად სულ გაცემულია 49 რეკომენდაცია. მომხსენებლის განმარტებით, ზოგ შემთხვევაში რეკომენდაცია ახლად არ გაცემულა, ვინაიდან წინა წლების აუდიტის ფარგლებში გაცემულ მითითებებს დამტკიცების ეტაპზე ჯერ კიდევ ჰქონდა სტატუსი მიმდინარე.