სავაჭრო მოლებში ფართებზე მოთხოვნა მიწოდებას აღემატება, ბრენდები ახალი სივრცეების გაჩენას ელოდებიან - “სინომი რითეილი"

სავაჭრო მოლებში არსებულ ფართებზე მოთხოვნა მიწოდებას გაცილებით აღემატება - ამის შესახებ “სინომი რითეილის” ხელმძღვანელი აცხადებს.

როგორც Zara-ს, Massimo Dutti-ს, Mango-ს და სხვა ბრენდების ოპერატორი კომპანიის ხელმძღვანელმა, რეზო მაღალაშვილმა “საქმის კურსის” ეთერში განაცხადა, ე.წ. ქუჩის რითეილი ფრაგმენტულობის გამო სავაჭრო ცენტრების მიმართულებით არსებულ დეფიციტს სრულად ვერ აბალანსებს.

მაღალაშვილი აღნიშნავს, რომ როგორც წესი, საერთაშორისო ბრენდები სწორედ სავაჭრო მოლების ფართებით ინტერესდებიან ხოლმე, ამიტომ ამ მიმართულებით დეფიციტი ქვეყანაში ახალი ბრენდების შემოყვანასაც აფერხებს.

მისი თქმით, “სინომი რითეილის” უახლოეს გეგმებში საქართველოში ორი მსხვილი ახალი საერთაშორისო ბრენდის შემოყვანა შედის, თუმცა ამ ეტაპზე კომპანია ახალი სავაჭრო სივრცეების გახსნის მოლოდინშია.

“დღეს თბილისის სავაჭრო მოლებში ვაკანტურობის მაჩვენებელი 6%-ის ფარგლებშია. ბუნებრივია ეს დაბალი მაჩვენებელია. თუმცა ეს 6%-იც არის არაპრემიალური ადგილები. შესაბამისად, პრემიუმ ლოკაციები თითქმის ყოველთვის სრულად დაჯავშნილია და ასეთ ობიექტებში ადგილმონაცვლეობა ძირითადად ერთი და იმავე ოპერატორის მიერ ბრენდის ჩანაცვლებით თუ ხდება ხოლმე. შესაბამისად, მოთხოვნა გაცილებით აღემატება მიწოდებას. დიდი სავაჭრო ცენტრები დაახლოებით 5-6 წელიწადში ერთხელ იხსნება. ასეთ დროს ხდება ძირითადად ახალი ბრენდების შემოყვანა ბაზარზე. ქუჩის რითეილი გარკვეულწილად აბალანსებს ხოლმე ამ შუალედურ პერიოდებს, თუმცა აქაც მიწოდება ძალიან მცირეა, თან ჩვენ კლასიკური “High Street” რითეილი არ გვაქვს, ანუ ძალიან ფრაგმენტულია. ამიტომ, გამოწვევას წარმოადგენს ნამდვილად კომერციული უძრავი ქონება [დეფიციტი].

[Galt&Taggart-ის] კვლევაში ნათქვამია, რომ გეგმაში არის და უახლოეს 2-3 წელიწადში ჩვენ დავინახავთ მნიშვნელოვან ზრდას მიწოდების ნაწილში, რაც ჩვენ, რითეილერებს, დაგვეხმარება ახალი ბრენდები შემოვიყვანოთ. გამომდინარე ეკონომიკური ზრდისგან, რომელიც ბოლო წლებში გვაქვს და იქიდან გამომდინარე, რომ ეს ზრდა კიდევ უფრო დიდ ზრდაში გადაისახა რითეილერებისთვის. თუ საუბარია მშპ-ს 7-8%-იან ზრდაზე, რითეილში ეს ზრდა ორნიშნა არის, 15%-დან 25%-მდე მერყეობს. შესაბამისად, ამ ეტაპზე გაზრდილ მოთხოვნას ჩვენ ვერ ვაკმაყოფილებთ. იქიდან გამომდინარე, რომ არ გვაქვს საკმარისი ლოკაციები და სწორედ შემდეგი 2-3 წელი იქნება გარდამტეხი ახალი ბრენდების შემოყვანის თვალსაზრისით. მით უმეტეს, ბაზარზე ძალიან ბევრი ახალი საერთაშორისო კომპანია გამოჩნდა, რომლებსაც პორტფელში არაერთი ცნობილი ბრენდი აქვთ. ამიტომ საინტერესო იქნება შემდეგი 2-3 წელიწადი.

ჩვენს პორტფელში ძირითადად წარმოდგენილია ე.წ. ენქორ ბრენდები, ეს არის დიდი ფორმატის ბრენდები, რომლებიც, როგორც წესი, მოლის ან სავაჭრო ცენტრის დაგეგმარების ადრეულ ეტაპზევე თანხმდება ხოლმე, რადგან ისინი მოითხოვენ პრემიუმ ადგილებს, პირველ სართულზე, მაქსიმალური ხილვადობით. ასეთი ლოკაციები როგორც წესი, 100%-ით დაკავებულია, შესაბამისად, ან მათ უნდა ჩაანაცვლონ არსებული ბრენდები, ან უნდა დაელოდონ ახალ დიდ პროექტებს. სწორედ ეს ახალი დიდი პროექტები არის 2-3 წლის განმავლობაში, რომელიც მწვანე შუქს აუნთებს ამ ბრენდებს. ჩვენ გვაქვს მინიმუმ ორი დიდი ფორმატის, მსოფლიოში განთქმული ბრენდი, რომელიც ელოდება ასეთი კომერციული უძრავი ქონების ბაზარზე შექმნას, რომ შემოვიდეს. ასევე ვიცი, რომ ბევრი კონკურენტიც, რომელიც ახლა შემოვიდა ბაზარზე, ასევე ელოდება მსგავსი სავაჭრო სივრცეების გაჩენას”, - განაცხადა რეზო მაღალაშვილმა.

აღსანიშნავია, რომ Galt&Taggart-ის კვლევის თანახმად, თბილისში არსებული 1.3 მილიონი კვადრატული მეტრის ფართობის სავაჭრო სივრციდან სავაჭრო მოლებზე მესამედი - 430 ათასი კვ.მ. მოდის. საინვესტიციო ბანკის ინფორმაციით, 2030 წლისთვის თბილისის სავაჭრო მოლების ფართობს დამატებით 140 ათასი კვ.მ. დაემატება.