სექტემბერში სასტუმროში განთავსება წლიურად გაძვირდა, თვის ჭრილში - გაიაფდა | PMCG Research

სექტემბერში სასტუმროში განთავსება წლიურად გაძვირდა, თვის ჭრილში კი გაიაფდა - ამის შესახებ PMCG Research-ის მიერ booking.com-ის მონაცემებზე დაყრდნობით გამოქვეყნებული სასტუმროს ფასების სექტემბრის ინდექსიდან ხდება ცნობილი.

PMCG Research-ის მონაცემებით, 2026 წლის სექტემბერში საქართველოს სასტუმროს ფასების ინდექსი წინა თვესთან შედარებით 7.2%-ით შემცირდა, 2025 წლის სექტემბერთან შედარებით კი 8%-ით გაიზარდა. ოთახის საშუალო ფასი 130-დან 546 ლარამდე მერყეობდა.

განახლებული მიმოხილვის მიხედვით, 3-, 4- და 5-ვარსკვლავიან სასტუმროებში ინდექსი 8.7%-ით შემცირდა, საოჯახო ტიპის სასტუმროებში კი 3.1%-ით. თვიურად სასტუმროში განთავსება ყველაზე მეტად გურიაში, აჭარასა და სამცხე-ჯავახეთში გაიაფდა.

„ყველაზე დიდი თვიური შემცირება გურიაში დაფიქსირდა. მას მოსდევს აჭარა (-17.9%) და სამცხე-ჯავახეთი (-10.1%). კახეთი ერთადერთი რეგიონია, სადაც ინდექსი წინა თვესთან შედარებით გაიზარდა (+2.1%)“, - ნათქვამია მიმოხილვაში.

წლიურად 3-, 4- და 5-ვარსკვლავიან სასტუმროებში ინდექსი 8%-ით, საოჯახო ტიპის სასტუმროებში კი 7.9%-ით გაიზარდა. ყველაზე დიდი წლიური ზრდა რაჭაში დაფიქსირდა. მას მოსდევს სამეგრელო-ზემო სვანეთი (+11.8%) და კახეთი (+10.6%).

ცნობისთვის, სასტუმროს ფასების ინდექსის შედეგები ეფუძნება booking.com-ზე რეგისტრირებული 568 3, 4, 5-ვარსკვლავიანი და 371 საოჯახო ტიპის სასტუმროს სტანდარტული ორადგილიანი ნომრების ფასებს საქართველოს 10 რეგიონსა და თბილისში.