"სკოლის ატესტატთან ერთად, წელს მე-12 კლასელები პროფესიულ სერტიფიკატსაც მიიღებენ" - გივი მიქანაძე

წელს პირველად, მე-12 კლასის მოსწავლეები სკოლის გამოსაშვებ ატესტატთან ერთად კონკრეტული პროფესიის დამადასტურებელ სერტიფიკატსაც მიიღებენ - ამის შესახებ საქართველოს განათლების მინისტრმა, გივი მიქანაძემ პარლამენტში, ინტერპელაციის წესით მოსმენისას განაცხადა.

მინისტრის განცხადებით, პროფესიული მიმართულება უწყებისთვის გამოკვეთილ პრიორიტეტს წარმოადგენს. მისივე თქმით, ორი წლის წინ სკოლებში, საშუალო საფეხურის დამამთავრებელ (მე-11 და მე-12) კლასებში, პირველად დაინერგა ინტეგრირებული სწავლება, რამაც აღნიშნული შესაძლებლობა გააჩინა.

"სულ რამდენიმე კვირაში ჩვენ მე-12 კლასელებს, სკოლის დამთავრების ატესტატთან ერთად, კონკრეტული პროფესიის დამადასტურებელ სერტიფიკატს გადავცემთ. 80-ზე მეტი სკოლაა, რომელიც ქვეყნის მასშტაბით ჩართულია ამ პროცესში, და ასობით ახალგაზრდა, ვინც ამ პროცესში მონაწილეობს", - განაცხადა გივი მიქანაძემ.

როგორც განათლების მინისტრმა აღნიშნა, მიღებული კვალიფიკაციის საფუძველზე, ახალგაზრდებს შრომის ბაზარზე ინტეგრაციის შესაძლებლობა მიეცემათ.

"მათ უკვე ამ კვალიფიკაციის დადასტურების საფუძველზე, როგორც კი მიიღებენ შესაბამის დიპლომს, უკვე თავისუფლად შეეძლებათ, რომ ინდივიდუალურ მეწარმეებად ან დაქირავებულ თანამშრომლად დაიწყონ სხვადასხვა საწარმოებში მუშაობა", - აღნიშნა მინისტრმა პარლამენტში გამოსვლისას.

საჯარო სკოლებში ინტეგრირებული სწავლება 2024 წლის სექტემბრიდან, მაშინდელი მინისტრის, გიორგი ამილახვრის ინიციატივით დაინერგა. სამინისტრომ მოსწავლეებს ეროვნულ სასწავლო გეგმასთან ინტეგრირებული პროფესიული საგანმანათლებლო პროგრამები შესთავაზა, რომლებიც თავდაპირველად, საპილოტედ შერჩეულ 20 საჯარო სკოლაში განხორციელდა.

სამინისტროს ინიციატივით, მე-11 და მე-12 კლასის მოსწავლეებს ერთდროულად პროფესიული განათლების დამადასტურებელი დიპლომის და ზოგადი განათლების დამადასტურებელი ატესტატის მიღების საშუალება მიეცათ.