სომხეთის ანტიკორუფციულმა კომიტეტმა ამომრჩეველთა მოსყიდვის ახალი სქემები გამოავლინა - დაკავებულია რამდენიმე პირი
სომხეთის ანტიკორუფციულმა კომიტეტმა და ეროვნული უსაფრთხოების სამსახურმა ხმების სავარაუდო მოსყიდვის ფაქტზე სისხლის სამართლის საქმე აღძრეს, რომლის ფარგლებშიც რამდენიმე პირი უკვე დაკავებულია. ამის შესახებ ინფორმაციას ადგილობრივი მედია უწყების პრესსამსახურზე დაყრდნობით ავრცელებს.
გამოძიების ვერსიით, პოლიტიკური ბლოკის, „ძლიერი სომხეთის“ მხარდამჭერებმა, სხვა პირებთან ერთად, რუსეთში მცხოვრებ სომხეთის მოქალაქეებს (ცოლ-ქმარს) კონკრეტული გარიგება შესთავაზეს. კერძოდ, მხარდაჭერისა და 8 ივნისის საპარლამენტო არჩევნებზე ხმის მიცემის სანაცვლოდ, მათ დაჰპირდნენ, რომ დაეხმარებოდნენ რუსეთის ფედერაციაში ნარკოტიკების შენახვისთვის მსჯავრდადებული შვილების გათავისუფლებასა და სომხეთში ეტაპირებაში. პირობა მოიცავდა სხვა ამომრჩევლების მსგავსი გზით მოზიდვასაც.
ანტიკორუფციული კომიტეტის ცნობით, აღნიშნულ ფაქტზე დაწყებული წარმოების ფარგლებში უკვე ჩატარდა შესაბამისი საგამოძიებო მოქმედებები და დაკავებულია რამდენიმე პირი.
უწყება საქმის დეტალების ამსახველ ვიდეომასალასაც აქვეყნებს.
BM.GE
წყარო: bm.ge