"სომხეთის მოქალაქეები ევროკავშირთან უვიზო რეჟიმს კიდევ ერთი ნაბიჯით მიუახლოვდნენ" - მარტა კოსი

სომხეთის მოქალაქეები ევროკავშირში უვიზოდ მოგზაურობასთან ერთი ნაბიჯით ახლოს არიან - ამის შესახებ გაფართოების საკითხებში ევროკომისარმა მარტა კოსიმ სოციალურ ქსელ "X"-ში დაწერა.

კოსის განმარტებით, ევროკავშირის მხარდაჭერით, სომხეთის მოქალაქეები ახალი ბიომეტრიული პასპორტების მიღებას შეძლებენ, რაც საზღვარზე შემოწმებას დააჩქარებს და მოგზაურობას გაამარტივებს.

"სომხეთის მოქალაქეები ევროკავშირში უვიზოდ მოგზაურობასთან ერთი ნაბიჯით ახლოს არიან. ევროკავშირის მხარდაჭერით, მათ უკვე შეეძლებათ ახალი ბიომეტრიული პასპორტების აღება, რაც სასაზღვრო შემოწმებას უფრო სწრაფს, მოგზაურობას კი უფრო მარტივს გახდის.

სომხეთი ევროპასთან უფრო მჭიდრო კავშირებს ირჩევს, ჩვენ კი ვზრუნავთ, რომ ეს არჩევანი მისმა ხალხმა რეალურად იგრძნოს", - აღნიშნა კოსიმ.

ევროკავშირსა და სომხეთს შორის სავიზო რეჟიმის ლიბერალიზაციის შესახებ დიალოგი 2024 წლის სექტემბერში დაიწყო. 2025 წლის ნოემბერში ევროკომისიამ სომხეთს სავიზო ლიბერალიზაციის სამოქმედო გეგმა (VLAP) წარუდგინა, სადაც დეტალურადაა გაწერილი ის რეფორმები და მოთხოვნები, რაც ქვეყანამ ევროკავშირში ხანმოკლე ვიზიტებისთვის უვიზო მიმოსვლის დასაწესებლად უნდა შეასრულოს.

სომხეთმა ახალი ბიომეტრიული პასპორტებისა და პირადობის ელექტრონული მოწმობების (ID ბარათების) გაცემის სისტემა 1 ნოემბერს აამოქმედა.