S&P 500-ის და Nasdaq-ის შეფასება ახალ რეკორდზე ავიდა

აშშ-ირანის სამშვიდობო მოლაპარაკებების ფონზე დაწყებული აღმასვლის ტენდენცია ისევ გრძელდება - ამერიკულმა საფონდო ბირჟამ ახალ რეკორდულ ნიშნულამდე გაზრდა შეძლო.

კერძოდ, ძირითადი ინდექსის, S&P 500-ის მაჩვენებელმა 7,519 პუნქტს მიაღწია, რაც ისტორიული მაქსიმუმია. ერთწლიან პერიოდში ინდექსს თითქმის 27%-იანი ზრდა აქვს, რაც ისტორიულ საშუალო მაჩვენებელზე 2-ჯერ მეტია.

რეკორდული შედეგი აქვს Nasdaq-ის ტექნოლოგიურ ინდექსსაც, რომელიც ამჟამად 26,656-იან ნიშნულზე იმყოფება, რაც მსხვილი კომპანიების მკვეთრი ზრდით არის განპირობებული, მათ შორის გამორჩეულ შედეგებს აფიქსირებენ: NVIDIA, Google, Apple, Amazon, Microsoft, Broadcom და Tesla.

აღმასვლის მიზეზს რაც შეეხება - ის, პირველ რიგში, ახლო აღმოსავლეთში კონფლიქტის დასრულების მოლოდინს და მსხვილი კომპანიების მიერ წარმოდგენილ ფინანსურ შედეგებს უკავშირდება, რომლებმაც ინვესტორების მოლოდინებს გადააჭარბეს და რეკორდული შემოსავლების მიღება შეძლეს.

ამასთან, საინვესტიციო ბანკებმა და ანალიტიკოსებმა AI-ბუშტის არსებობასთან დაკავშირებით შიშები უარყვეს და ამერიკული საფონდო ბირჟის ზრდის მოლოდინები გააუმჯობესეს. ექსპერტები ფიქრობენ, რომ ძლიერი კორპორაციული შემოსავლების ფონზე, წელს S&P 500-მა და Nasdaq-მა კიდევ არაერთი რეკორდის დაფიქსირება უნდა შეძლონ.