SpaceX უკვე Nasdaq 100-ის ინდექსში შევიდა

ილონ მასკის კოსმოსური კომპანია SpaceX დაჩქარებული წესით Nasdaq-100-ის ინდექსში შეიყვანეს, რომელიც საფონდო ბირჟაზე განთავსებულ უმსხვილეს ტექნოლოგიურ კომპანიებს აერთიანებს.

ამ ცვლილების შედეგად, პასიურ ფონდებს $6 მილიარდის ღირებულების ფასიანი ქაღალდების შეძენა მოუწევთ, რაც თავისუფალ ბრუნვაში არსებული აქციების დაახლოებით 6%-ს შეადგენს. აღსანიშნავია, რომ მიმდინარე კვირაში კომპანიის პირველი ფინანსური ანგარიშგების გამოქვეყნების შემდეგ, ბაზარზე სავაჭროდ აქციების დამატებითი 20% გახდება ხელმისაწვდომი, რაც ინდექსაციით გამოწვეულ წნეხს შეამსუბუქებს.

მნიშვნელოვანია ითქვას, რომ Nasdaq-ი კომპანიას ინდექსში თავისუფალ ბრუნვაში არსებული აქციების მიხედვით აკორექტირებს, სადაც ამჟამად $102 მილიარდის ღირებულების 638 მილიონი აქციაა ხელმისაწვდომი. საფონდო ბირჟის გადაწყვეტილებით, აღნიშნული მაჩვენებელი სამზე გამრავლდება, რაც SpaceX-ს ბაზარზე $300 მილიარდიანი კაპიტალიზაციის მქონე სუბიექტის გავლენას მიანიჭებს და ინდექსის მთლიანი ღირებულების 0.75%-ს გაუტოლებს. რაც შეეხება სამომავლო პროგნოზებს, უოლ-სტრიტის ანალიტიკოსები კომპანიის შემოსავლების სწრაფ ზრდას ელიან, რამაც 2026 წელს შესაძლოა $36 მილიარდი შეადგინოს, 2030 წლისთვის კი მაჩვენებელი $200 მილიარდამდე გაიზარდოს.

შეგახსენებთ, რომ SpaceX-მა ივნისში გამართულ პირველად საჯარო შეთავაზებაზე რეკორდული $86 მილიარდი მოიზიდა, თუმცა ის ჯერაც არ იყო თავად Nasdaq-100 ინდექსში, რომელსაც ის დღეს შეუერთდა.