სტალინის ₾66 000-იანი ნახატი, იარაღები, უძრავი ქონება... - რა ქონებას ფლობს ბეჟან წაქაძე?

სტალინის, ტიმჩენკოს, ახვლედიანი ძვირადღირებული ნახატები, ცეცხლსასროლი იარაღები, უძრავი ქონება და დანაზოგი ნაღდი ფულის სახით - ასეთია „ქართული ოცნების“ დეპუტატის ბეჟან წაქაძის ქონებრივი დეკლარაცია, რომელიც მან 2025 წლის მდგომარეობით წარადგინა.

დოკუმენტის მიხედვით, გასულ წელს მან პარლამენტში დეპუტატის პოზიციაზე 114 097 ლარის ხელფასი აიღო, ამასთან ბეჟან წაქაძე წერს, რომ ანაბრიდან საპროცენტო შემოსავალი 238 ლარი ჰქონდა, მივლინებისთვის 534 ლარი დაურიცხეს, ანგარიშზე კი 3 600 ლარი შეიტანა. ცოლის შემოსავლები დეპუტატს მითითებული არ აქვს.

ბეჟან წაქაძეს ნაღდი ფულის სახით 22 300 ლარის დანაზოგი აქვს, საქართველოს ბანკის ანაბარზე კი 2 115 ლარი უდევს.

„ოცნების“ დეპუტატს შვილმა გასულ წელს LAND ROVER აჩუქა. 2014-წლიანი ავტომობილის ღირებულება 20 000 დოლარი იყო. მის ცოლს ნონა ბურკაძე LEXUS GX 470-ს ფლობს, რომელიც 2016 წელს 15 000 ლარად აქვს ნაყიდი.

ამასთან, დეკლარაციაში წაქაძე აღნიშნავს, რომ მან 2025 წელს 80 500 ლარი ქველმოქმედებაზე დახარჯა.

უძრავი ქონება

ბეჟან წაქაძე, რომელიც „ქართული ოცნების“ რიგებსა და პოლიტიკაში 2020 წელს ბიზნესიდან მოვიდა, დეკლარაციაში უთითებს არაერთ ბინას, მიწის ნაკვეთებს და აგარაკებს, რომლებსაც ის და ცოლი ფლობენ. ყველაზე ბოლოს დეპუტატმა 2024 წლის ბოლოს ზესტაფონის სოფელ მეორე სვირში 9 მიწის ნაკვეთი მემკვიდრეობით მიიღო. მისივე საკუთრებაშია ამავე სოფელში 3 000 ლარად ნაყიდი 500 კვ.მ.-ის მიწა და ნაჩუქარი 4 371 კვ.მ. მიწა. მისი ცოლი ნონა ბურკაძე ფლობს ასევე 2015 წელს 9910 ლარად ვანში სოფელ მუქედში ნაყიდ და ციხესულორში მემკვიდრეობით მიღებულ მიწებს. ბურჯაძის საკუთრებაშია თბილისში, ბოჭორიშვილის ქუჩაზე 2012 წელს 16 500 ლარდ შეძენილი 16.5 კვ.მ-ის ავტოფარეხი და 73.5 კვ.მ-ის სახელოსნო, რომელიც მან 194 949 ლარად 2012 წელს შეიძინა, ჭავჭავაძის გამზირზე 2013 წელს 33 000 ლარად შეძენილი ავტოფარეხი და ილო მოსაშვილის ქუჩაზე ჩუქებით მიღებული 86 კვ.მ-ის დამხმარე ფართი. მოსაშვილის ქუჩაზე მას ჩუქებით აქვს ასევე მიღებული 142.8 კვ.მ.-ის ტექნიკური მოხმარების ტერასა.