სტეიბლკოინების რაოდენობით დოლარის შემდეგ ყველაზე პოპულარული თურქულ ლირაა - Zodia Markets

სტეიბლკოინების რაოდენობით დოლარის შემდეგ ყველაზე პოპულარული ვალუტა თურქულ ლირაა - ამის შესახებ ინფორმაციას Standard Chartered-ის შვილობილი კრიპტოკომპანია Zodia Markets-ი ავრცელებს.

აღნიშნულ პლატფორმაზე თურქულ ლირაზე მიბმული სტაბილური კრიპტოვალუტები მეორე ყველაზე გამოყენებადი ციფრული აქტივი გახდა. მართალია, ამ აქტივების მოცულობა აშშ დოლარზე მიბმულ ტოკენებთან შედარებით მცირეა, თუმცა ის ევროსა თუ სხვა წამყვან ვალუტებს მაინც უსწრებს.

Zodia Markets-ის თანადამფუძნებლის, ნიკ ფილპოტის განცხადებით, გასულ წელს პლატფორმაზე თურქული ლირის სტაბილურ კრიპტოვალუტაზე მოთხოვნა მოულოდნელად გაიზარდა. როგორც ირკვევა, მომხმარებლები მას სტანდარტული საბანკო გზავნილების ალტერნატივად იყენებდნენ, რადგან ის ანგარიშსწორებისას გაცილებით სწრაფად მუშაობს და ნაკლებ საკომისიოს მოითხოვს.

Standard Chartered-ის კრიპტოანალიტიკოსის, ჯეფ კენდრიკის შეფასებით, სტაბილურ კრიპტოვალუტებზე მოთხოვნა მომავალში კიდევ უფრო გაიზრდება იმ ქვეყნებში, სადაც ფინანსური ინფრასტრუქტურა სუსტია. აღსანიშნავია, რომ ბაზარზე ლიდერ პოზიციებს ამჟამად კომპანიები: Tether-ი და Circle-ი ინარჩუნებენ. მათ მიმოქცევაში არსებული აქტივები ჯამურად $264 მილიარდს აღემატება

ცნობისთვის, სტაბილური კრიპტოვალუტები ტრადიციულ ფიატის ვალუტებზე მიბმული ციფრული აქტივებია.