Stellantis-ი საფრანგეთში ინვესტიციებს ზრდის და Peugeot-ს ახალი ელექტრომობილების წარმოებას იწყებს
ავტომწარმოებელმა Stellantis-მა განაცხადა, რომ განახლებული გლობალური სტრატეგიისა და ახალი პროდუქტების გამოშვების ფარგლებში, 2029 წლიდან აღმოსავლეთ საფრანგეთში, მიულუზის ქარხანაში Peugeot-ს სამი ახალი ელექტრო და ჰიბრიდული მოდელის წარმოებას დაიწყებს.
ახალი მოდელების ჩაშვებას მხარს მიულუზის ქარხანაში განხორციელებული 400 მილიონი ევროს ინვესტიცია დაუჭერს, რასაც კვლევისა და განვითარებისთვის კიდევ 500 მილიონი ევრო დაემატება. R&D-ის ხარჯების დიდი ნაწილი ახალ STLA One პლატფორმას მოხმარდება, რომელიც ელექტრიფიცირებული ავტომობილების ახალი ხაზის საფუძვლად არის შექმნილი.
ეს დეტალები მას შემდეგ გახდა ცნობილი, რაც საფრანგეთის პრეზიდენტმა ემანუელ მაკრონმა მაისში ფრანგულ-იტალიური ავტომწარმოებლის მიერ საფრანგეთში 1 მილიარდი ევროს ინვესტიციის შესახებ განაცხადა.
გასულ თვეში წარდგენილი Stellantis-ის ახალი სტრატეგიის ერთ-ერთი მთავარი საყრდენი - STLA One პირველად ესპანეთში, 2027 წელს ამოქმედდება, სადაც ახალი Peugeot 208-ის წარმოება დაიწყება.
აღმასრულებელმა დირექტორმა, ანტონიო ფილოსამ მიულუზის ობიექტზე ჟურნალისტებს განუცხადა, რომ Stellantis-ი 2035 წლისთვის ახალ პლატფორმაზე გლობალურად წელიწადში 2 მილიონი ავტომობილის წარმოებას გეგმავს.
მისი თქმით, ახალი პლატფორმა არსებულ არქიტექტურებთან შედარებით დაახლოებით 20%-ით უფრო კონკურენტუნარიანი იქნება.
"ეს იქნება პლატფორმა, რომელიც Stellantis-ს ჩინურ კომპანიებთან ხარჯების თანაბარ დონემდე მიიყვანს“, - აღნიშნა ფილოსამ.
მან დასძინა, რომ კომპანია ევროპაში ჭარბი საწარმოო სიმძლავრეების შემცირებაზეც მუშაობს, რასაც პარტნიორებთან ქარხნების გაზიარებით (მაგალითად რენში) ან მიულუზის მსგავს ობიექტებზე ახალ პროდუქტებში ინვესტირებით აღწევს.