Superhuman-მა (Grammarly-მ) შეხვედრების ჩამწერი პლატფორმა Fathom-ი შეიძინა

ტექნოლოგიურმა კომპანია Superhuman-მა, რომელიც ადრე Grammarly-ს სახელით იყო ცნობილი, შეხვედრების ჩამწერი და ტრანსკრიფციის შემქმნელი სტარტაპი Fathom-ი შეიძინა. საყურადღებოა, რომ გარიგების ფინანსური დეტალები არ გასაჯაროვდა, თუმცა გაირკვა ის, რომ Fathom-ის გუნდი მუშაობას Superhuman-ის შემადგენლობაში გააგრძელებს.

არსებული ინფორმაციით, შეხვედრების გაანალიზებისთვის შექმნილი პლატფორმით ასობით ათასი კომპანია სარგებლობს. სერვისი მომხმარებლებს წინა საუბრებიდან მნიშვნელოვანი დეტალების მოძიებაში, შეთანხმებების გახსენებასა და სამუშაო სიების შედგენაში ეხმარება. ამასთან, სისტემას დამატებითი ბოტის გარეშე შეხვედრების ჩაწერა და რეალურ დროში მოკლე შინაარსის მომზადება შეუძლია.

როგორც ირკვევა, Superhuman-ი Fathom-ის ტექნოლოგიის ინტეგრაციას ელექტრონული ფოსტის, კალენდრის, დოკუმენტებისა და მონაცემთა ბაზების პროდუქტებში გეგმავს. ეს გადაწყვეტილება Superhuman Go-სა და ციფრულ ასისტენტებს შეხვედრების მონაცემების გამოყენების შესაძლებლობას მისცემს. შედეგად, სამუშაო შეხვედრის დასრულების შემდეგ ასისტენტი საუბრის ჩანაწერს თავად გააანალიზებს და პროექტების მართვის მხრივ ცვლილებებს დამოუკიდებლად მოამზადებს. მენეჯერს მხოლოდ ამ მონაცემების გადამოწმება და დამტკიცება მოუწევს.