SWIFT-ის ბლოკჩეინზე დაფუძნებული პლატფორმა ასამუშავებლად მზად არის

მსოფლიო საბანკო სისტემის საკომუნიკაციო ინფრასტრუქტურის ოპერატორმა, Swift-მა განაცხადა, რომ მისი ბლოკჩეინზე დაფუძნებული ციფრული რეესტრი პირველადი გამოყენებისთვის მზად არის.

ახალი ტექნოლოგიური პლატფორმა ფინანსურ ინსტიტუტებს ტოკენიზებული დეპოზიტების გამოყენებით 24/7 რეჟიმში საერთაშორისო გადახდების განხორციელების შესაძლებლობას მისცემს.

არსებული ინფორმაციით, ინფრასტრუქტურა საშუალებას იძლევა, ფულადი სახსრების გადარიცხვა ღამით და უქმე დღეებშიც კი განხორციელდეს, რის შემდეგაც საბოლოო ანგარიშსწორება არსებული ტრადიციული სისტემების მეშვეობით დასრულდება. პროექტი, რომელიც გასულ წელს დაანონსდა, საერთაშორისო ფინანსური ინსტიტუტების უკუკავშირის საფუძველზე შეიქმნა და ეს მისი გამოყენების პირველი პრაქტიკული შემთხვევაა.

როგორც ირკვევა, საპილოტე პროექტში რეალური ტრანზაქციების განსახორციელებლად ექვსი კონტინენტის 17 ბანკი აქტიურად ჩაერთვება. საპილოტე პროგრამაში მონაწილე ფინანსურ ინსტიტუტებს შორის ისეთი მსხვილი ბანკები ირიცხებიან, როგორებიც არიან: BNP Paribas, Citi, DBS, HSBC, Standard Chartered, UBS და Wells Fargo.