თავისუფალ ბიზნესთა ასოციაცია ონლაინ ამანათების განბაჟების ზღვრის 900 ლარამდე გაზრდას ითხოვს

თავისუფალ ბიზნესთა ასოციაცია ახალი ინიციატივით გამოდის და ფინანსთა სამინისტროს მოუწოდებს, გადაიხედოს საფოსტო გზავნილების 300-ლარიანი უბაჟო ზღვარი. ორგანიზაციაში მიიჩნევენ, რომ აღნიშნული ლიმიტი მოძველებულია და ვეღარ პასუხობს თანამედროვე ეკონომიკურ რეალობასა და საერთაშორისო ვაჭრობის ტემპებს.

ასოციაციის წინადადებაა, რომ დღეს არსებული 300-ლარიანი ლიმიტი 900 ლარამდე გაიზარდოს.

ორგანიზაციაში განმარტავენ, რომ 300-ლარიანი ზღვარი 2009 წელს განისაზღვრა და მას შემდეგ, 17 წლის განმავლობაში, ქვეყნის ეკონომიკური პარამეტრები არსებითად შეიცვალა:

• ლარის გაუფასურება: 2009 წლიდან დღემდე ეროვნული ვალუტის კურსი აშშ დოლართან მიმართებით 38%-ზე მეტად არის გაუფასურებული (1.67 ლარიდან თითქმის 2.67 ლარამდე). • ინფლაცია და ფასების ზრდა: სამომხმარებლო ფასების ინდექსის (CPI) მიხედვით, საქართველოში ფასების საერთო დონე ამ პერიოდში დაახლოებით 65–70%-ით გაიზარდა. • ელექტრონული კომერციის ბუმი: გლობალური ეკონომიკის განვითარებამ და ონლაინ ვაჭრობის უპრეცედენტო ზრდამაც დღის წესრიგში დააყენა ძველი რეგულაციების გადახედვის საჭიროება.

„17 წლის წინ დადგენილი ზღვარი დღეს უკვე ვეღარ ასახავს რეალურ ეკონომიკურ საჭიროებებსა და მოსახლეობის მსყიდველუნარიანობას“, - აცხადებენ ასოციაციაში.

თავისუფალ ბიზნესთა ასოციაცია ასევე ეხმაურება ჯგუფების აქტივობას, რომლებიც, პირიქით, 300-ლარიანი ზღვრის სრულად გაუქმებას ითხოვენ. ასოციაცია ოპონენტების არგუმენტებს უსაფუძვლოს უწოდებს.

"თავისუფალ ბიზნესთა ასოციაცია ასევე ყურადღებით აკვირდება სხვადასხვა ლობისტური ჯგუფის აქტივობას, რომლებიც, პირიქით, 300-ლარიანი განბაჟების ზღვრის გაუქმებას მოითხოვენ. მათი არგუმენტებია თითქოს არათანაბარი კონკურენცია და ქვეყნის ეკონომიკური კეთილდღეობის დაცვა. მოკლედ გვინდა ამ არგუმენტებსაც ვუპასუხოთ.