"თბილისი-შანხაის პირველი პირდაპირი რეისი, ფაქტობრივად, სავსე ჩამოვიდა" - მარიამ ქვრივიშვილი
"თბილისი-შანხაის პირველი პირდაპირი რეისი, ფაქტობრივად, სავსე ჩამოვიდა", - განაცხადა ეკონომიკისა და მდგრადი განვითარების მინისტრმა მარიამ ქვრივიშვილმა თბილისი-შანხაის საინაუგურაციო რეისთან დაკავშირებით გამართულ ღონისძიებაზე.
ეკონომიკის სამინისტროს მიერ გავრცელებული ინფორმაციით, თბილისსა და შანხაის შორის ისტორიული, პირდაპირი რეგულარული რეისი ჩინეთის ერთ-ერთი უმსხვილესმა და წამყვანმა ავიაკომპანია China Eastern Airlines შეასრულა.
ავიაკომპანია პირდაპირ ფრენებს კვირაში სამჯერ: ოთხშაბათს, პარასკევსა და კვირას შეასრულებს.
უწყების ცნობით, სიტყვით გამოსვლისას ეკონომიკის მინისტრმა აღნიშნა, რომ თბილისსა და შანხაის შორის პირდაპირი რეგულარული ავიამიმოსვლა არის უმნიშვნელოვანესი წინგადადგმული ნაბიჯი, რომელიც კიდევ უფრო მეტად დააახლოებს საქართველოსა და ჩინეთს ერთმანეთთან და სწორედ ის გადაწყვეტილებაა, რომელიც ამყარებს ქვეყნებს შორის გაფორმებულ სტრატეგიულ თანამშრომლობას.
„ეს არის ნამდვილად კიდევ ერთი მნიშვნელოვანი დემონსტრაცია, თუ რას ნიშნავს სტრატეგიული პარტნიორობა, როგორ ითარგმნება სტრატეგიული პარტნიორობა ეკონომიკურ აქტივობაში, როგორ ითარგმნება ტურიზმში, როგორ ითარგმნება პირდაპირ ფრენებში და ეს ყველაფერი როგორ აძლიერებს ჩვენი ქვეყნის ეკონომიკას. განსაკუთრებით მოხარული ვარ, რომ დღეს თითოეული ჩვენგანი მონაწილეობს ამ ისტორიულ დღეში, რადგან ეს არის პირველი რეგულარული ფრენა, რომელიც შესრულდა ჩვენი დედაქალაქიდან და შესრულდება დღეს მოგვიანებით შანხაის მიმართულებით, რომელიც გულისხმობს რეალურად ყველაზე შორი მანძილის ფრენას“, - აღნიშნა მარიამ ქვრივიშვილმა.
შანხაისა და თბილისს შორის პირდაპირი ფრენების დაწყების შესახებ გადაწყვეტილება საქართველოს ეკონომიკისა და მდგრადი განვითარების მინისტრის, მარიამ ქვრივიშვილისა და ჩინური ავიაკომპანია China Eastern Airlines-ის ხელმძღვანელების შეხვედრაზე იქნა მიღებული, რომელიც მიმდინარე წლის აპრილში ჩინეთის სახალხო რესპუბლიკაში მინისტრის ოფიციალური ვიზიტის ფარგლებში გაიმართა.