თბილისის აეროპორტის ახალ ტერმინალში ტრანზიტული და სატრანსფერო მგზავრებისთვის სივრცე კარგად იქნება მოწყობილი - ზაქარაძე

თბილისის საერთაშორისო აეროპორტის ტერმინალი მნიშვნელოვნად ფართოვდება. "საქმიანი დილის" რუბრიკაში "საუბრები ავიაციაზე" „ტავ ჯორჯიას“ გენერალური მენეჯერი თეა ზაქარაძე აცხადებს, რომ ახალი ინფრასტრუქტურა განსაკუთრებულად ტრანზიტული ნაკადების მომსახურებაზე იქნება ორიენტირებული, რაც აეროპორტისთვის სტრატეგიულ მიმართულებას წარმოადგენს.

„ეს ტერმინალი, სადაც ჩვენ ახლა ვიმყოფებით, რეალურად 37 ათასი კვადრატული მეტრია და მას 22 ათას კვადრატულ მეტრამდე ახალი ფართი ემატება. ამ ახალ ტერმინალში სივრცე საკმაოდ კარგად იქნება მოწყობილი ტრანზიტული და სატრანსფერო მგზავრებისთვის. ვფიქრობ, თბილისი ნამდვილად იქნება ჰაბი და ჩვენ გვაქვს ამის პოტენციალი.

პირველი ყველაზე დიდი ავიაკომპანია, რომელიც ტრანსფერ მგზავრებზე მუშაობს Georgian Airways-ია. ის დღესდღეობით ნომერ პირველია მათ შორის, ვისაც ყველაზე მეტი ტრანსფერი მგზავრი შემოჰყავს თბილისის საერთაშორისო აეროპორტში. ძალიან მიხარია, რომ 2028 წლის მაისიდან თბილისის საერთაშორისო აეროპორტში ახალი სივრცეები გვექნება სწორედ სატრანსფერო მგზავრებისთვის", - განაცხადა ზაქარაძემ "საქმიან დილაში".