თბილისის მერია სიონის ტაძრისა და სამრეკლოს რეაბილიტაციას იწყებს - ბიუჯეტი ₾1.2 მილიონია
თბილისის განვითარების ფონდი სიონის ღვთისმშობლის მიძინების საკათედრო ტაძარში რეაბილიტაციის პროექტს იწყებს. ამის შესახებ დედაქალაქის მერმა, კახა კალაძემ მუნიციპალიტეტის მთავრობის დღევანდელ სხდომაზე განაცხადა.
მისი განმარტებით, ტაძარი და მისი სამრეკლო კულტურული მემკვიდრეობის ძეგლს წარმოადგენს, რომლის ფრესკებსაც ამჟამად დაზიანების საფრთხე ემუქრება.
შესყიდვების სააგენტოს ვებგვერდის მიხედვით, რეაბილიტაციას შპს რემონტი2 განახორციელებს და 1.2 მლნ ლარი დაიხარჯება. რეაბილიტაცია 2028 წლის დეკემბერში უნდა დასრულდეს.
„ჩვენი ქალაქისთვის დიდი სიმდიდრეა კულტურული მემკვიდრეობის სტატუსის მქონე ძეგლების არსებობა. ამ მიმართულებით არაერთი მნიშვნელოვანი პროექტი განვახორციელეთ. თბილისის განვითარების ფონდი ამჯერად რეაბილიტაციის პროექტს იწყებს სიონის ტაძარში“, — განაცხადა კახა კალაძემ.
მერის თქმით, ამ ეტაპზე დაზიანებულია ტაძრის გადახურვა და სამრეკლო, რის გამოც მოსული ნალექი შენობაში აღწევს.
„არსებული მდგომარეობით დაზიანებულია ტაძრის გადახურვა და სამრეკლო, რის გამოც მოსული ნალექი აზიანებს კედლებს და საფრთხეს უქმნის ტაძარში არსებულ ფრესკებს. შესაბამისად, რეაბილიტაცია ჩაუტარდება ტაძრის აღნიშნულ ნაწილს“, — აღნიშნა მერმა.
კალაძის განცხადებით, სატენდერო პროცედურები უკვე დასრულებულია, გამოვლენილია გამარჯვებული კომპანია და მასთან ხელშეკრულებაც გაფორმდა. პროექტის მიხედვით, სარეაბილიტაციო სამუშაოები მიმდინარე წლის ოქტომბრის ბოლოს უნდა დასრულდეს.
BM.GE
წყარო: bm.ge