თბილისის მერის მოადგილემ 2025 წელს Harley Davidson-ი და 1994-წლიანი Mercedes-ი იყიდა|ირაკლი ბენდელიანის დეკლარაცია

თბილისის მერის მოადგილე ირაკლი ბენდელიანმა 2025 წელს მეორადი მოტოციკლი Harley Davidson და 1994 წლიანი ავტომობილი Mercedes Benz E280 შეიძინა. ამის შესახებ მის მიერ შევსებული ქონებრივი დეკლარაციიდან ხდება ცნობილი.

დოკუმენტის მიხედვით, მაღალჩინოსანმა მოტოციკლი 23 000 ლარად 2025 წლის დასაწყისში შეიძინა, ავტომობილი კი ოქტომბერში 3 700 დოლარად.

თბილისის მერის მოადგილეს ჰყავს მეუღლე და სამი შვილი. შევსებული დოკუმენტის მიხედვით, თავად ირაკლი ბენდელიანი უძრავ ქონებას არ ფლობს, მისი ცოლის თამარ ლობჟანიძის საკუთრებაშია 124 კვ.მ.-ის ბინა დევი აბაშიძის ქუჩაზე, რომელიც 2008 წელს 20 000 ლარად აქვს ნაყიდი.

2025 წლის განმავლობაში ირაკლი ბენდელიანმა თბილისის მერის მოადგილის თანამდებობაზე 85 941 ლარის ხელფასი აიღო, მისმა ცოლმა კი, რომელიც საქართველოს ენერგეტიკის განვითარების ფონდში იურისტის პოზიციაზე მუშაობს, 5 თვეში 18 613 ლარის ხელფასი მიიღო.

საბანკო დეპოზიტების ან ნაღდი დანაზოგის შესახებ ქონებრივ დეკლარაციაში მითითებული არ არის.

პროფესიით იურისტი ირაკლი ბენდელიანი, თბილისის მერის მოადგილედ 2017 წლიდან, ანუ მას შემდეგ მუშაობს, რაც კახა კალაძე თბილისის მერი გახდა. მანამდე 2016–2017 წლებში ის საქართველოს გაზის ტრანსპორტირების კომპანიის გენერალური დირექტორი იყო, უფრო ადრე 2015 –2016 წლებში კი საქართველოს ენერგეტიკის სამინისტროში ადმინისტრაციული დეპარტამენტის უფროსის მოადგილის პოსტს იკავებდა, 2012-2015 წლებში კი იმავე უწყებაში ადმინისტრაციული დეპარტამენტის სახელმწიფო შესყიდვების და მატერიალური უზრუნველყოფის სამმართველოს უფროსი იყო. ამ პერიოდში ენერგეტიკის მინისტრი კახა კალაძე იყო.

უფრო ადრე 2011-2012 წლებში სს „საქართველოს ენერგეტიკის განვითარების ფონდი“ შესყიდვების სამსახურის უფროსი იყო, მანამდე კი ენერგეტიკის სამინისტროში 2007-2011 წლებში ადმინისტრაციული დეპარტამენტის სახელმწიფო შესყიდვების და მატერიალური უზრუნველყოფის სამმართველოს უფროსის პოზიციაზე იყო.