თბილისის შემოვლითი გზის მშენებლობისთვის საქართველო-ADB-ის შორის $250-მილიონიანი სასესხო შეთანხმება გაფორმდა

საქართველოსა და აზიის განვითარების ბანკს (ADB) შორის გაფორმდა სასესხო შეთანხმება, რომელიც თბილისის შემოვლითი გზის მშენებლობისთვის 250 მილიონი აშშ დოლარის ფინანსური რესურსის გამოყოფას ითვალისწინებს.

დოკუმენტს ხელი ფინანსთა მინისტრმა, ლაშა ხუციშვილმა და აზიის განვითარების ბანკის (ADB) საქართველოს მუდმივი წარმომადგენლობის დირექტორმა, ლესლი ბეარმან ლაჰმმა მოაწერეს.

პროექტის ფარგლებში იგეგმება თბილისის შემოვლითი გზის, დაახლოებით, 18.9-კილომეტრიანი, ოთხზოლიანი საავტომობილო გზის მონაკვეთის მშენებლობა, რომელიც გამყოფი ზოლით იქნება აღჭურვილი.

გამოყოფილი დაფინანსება კონკრეტულად ორ მონაკვეთს მოხმარდება:

• ლოტი 4: თბილისის აეროპორტი – ლოჭინი; • ლოტი 5: ლოჭინი – რუსთავი.

უწყების განმარტებით, ახალი მაგისტრალის მშენებლობა მიზნად ისახავს დედაქალაქში მოძრაობის განტვირთვას, სატრანზიტო ნაკადების უსაფრთხოების გაუმჯობესებასა და ქვეყნის სატრანსპორტო დერეფნების გამტარუნარიანობის გაზრდას.

სამშენებლო სამუშაოებს საქართველოს ინფრასტრუქტურის სამინისტრო, საავტომობილო გზების დეპარტამენტის მეშვეობით განახორციელებს.

ცნობისთვის, თბილისის შემოვლითი გზა (ნატახტარი/წიწამური - რუსთავი) საერთო ჯამში დაახლოებით 49 კილომეტრის სიგრძისაა და რამდენიმე ლოტად ხორციელდება. პროექტის მე-2 და მე-3 ლოტების მშენებლობისთვის სატენდერო პროცედურები უკვე მიმდინარეობს. უფრო დეტალურად, 2025 წლის დეკემბერში გამოცხადებულ წიწამური-ავჭალის 7.3-კილომეტრიან 490 მილიონი ლარის სავარაუდო ღირებულების ტენდერში წინადადებების შეფასება უკვე მიმდინარეობს, აღნიშნულ ტენდერში არცერთმა მონაწილემ არ წარადგინა 490 მილიონ ლარზე დაბალი ფასი და წარდგენილი წინადადებები 520 მილიონი ლარიდან 952 მილიონ ლარამდე მერყეობს.

რაც შეეხება ავჭალა-აეროპორტის 22.5-კილომეტრიანი მონაკვეთის ტენდერს, მასში მონაწილეობა რვა კომპანიამ მიიღო და ამჟამად წინადადებების შეფასება მიმდინარეობს. ტენდერი 932 მილიონი ლარის სავარაუდო ღირებულებით გამოცხადდა, თუმცა მასში დაფიქსირებული მინიმალური ფასი 950 მილიონი ლარი, მაქსიმალური ფასი კი 1.16 მილიარდი ლარია.