Tesla-მ $30 მილიარდის საკრედიტო შეთანხმებები გააფორმა

ამერიკულმა ელექტრომობილების მწარმოებელმა Tesla-მ $30 მილიარდის საერთო მოცულობის ახალი საკრედიტო შეთანხმებები ოფიციალურად გააფორმა.

არსებული ინფორმაციით, ფინანსური პაკეტი $20 მილიარდის მოცულობის გადავადებულ სესხს, $8-მილიარდიან ხუთწლიან განახლებად საკრედიტო ხაზსა და $2-მილიარდიან 364-დღიან დაფინანსებას მოიცავს. ამ ნაბიჯით კომპანიამ 2028 წლის იანვარში ვადის გასვლის მქონე $5 მილიარდის ძველი საკრედიტო რესურსი სრულად ჩაანაცვლა.

აღსანიშნავია, რომ ხელშეკრულების შეწყვეტის მომენტში ძველ საკრედიტო ხაზზე დავალიანება არ ფიქსირდებოდა. როგორც ირკვევა, 29 სექტემბრის მდგომარეობით, ავტომწარმოებელს ახალი ლიმიტებიდან თანხა ჯერ არ გამოუყენებია და ის ამ რესურსის ათვისებას 2026 წელს არც გეგმავს.

მნიშვნელოვანია ითქვას, რომ მოზიდულ სახსრებს კომპანია ძირითადად ხელოვნური ინტელექტის გამოთვლითი ინფრასტრუქტურის განვითარებისკენ, მზის ელემენტების წარმოების გაფართოებისა და SpaceX-თან ერთობლივი ნახევარგამტარების საწარმოო პროექტისკენ მიმართავს.

ამას გარდა, გიგანტი კაპიტალის დაბანდებას წარმოების სხვა მიმართულებების გაფართოებაზეც გეგმავს. როგორც კომპანიის აღმასრულებელმა დირექტორმა ილონ მასკმა ვაშინგტონში გამართულ ღონისძიებაზე განაცხადა, კოსმოსური კომპანია Tesla-სთან პარტნიორობით წელიწადში 200 გიგავატის მოცულობის მზის ენერგიის წარმოებას ისახავს მიზნად.