"თიბისი", "საქართველოს ბანკი", "ლიბერთი", "ტერაბანკი" და "ბაზისბანკი" Nasdaq-ის სისტემას დანერგავენ

საქართველოს ეროვნული ბანკის ინფორმაციით, ქვეყნის ხუთი წამყვანი კომერციული ბანკი - „საქართველოს ბანკი“, „თიბისი ბანკი“, „ლიბერთი ბანკი“, „ტერაბანკი“ და „ბაზისბანკი“ - Nasdaq Calypso-ს საერთო პლატფორმას დანერგავს.

ეროვნული ბანკის ცნობით, პროექტი ხორციელდება საქართველოს ეროვნული ბანკის მხარდაჭერითა და საქართველოს ფინანსური ბაზრების ხაზინების ასოციაციის (GFMTA) ეგიდით, „საქართველოს ფინანსური ბაზრების განვითარების პროგრამის“ (GMAP) ფარგლებში. Nasdaq Calypso წარმოადგენს საერთო ინფრასტრუქტურულ სისტემას, რომელიც საბანკო სექტორს სავაჭრო ოპერაციების სრული ციკლის მართვის შესაძლებლობას მისცემს.

ეროვნული ბანკის განმარტებით, ხუთი ბანკის მიერ ერთიან, საერთაშორისოდ აღიარებულ პლატფორმაზე გადასვლა საქართველოს კაპიტალის ბაზრების განვითარების მიმართულებით მნიშვნელოვანი ნაბიჯია. პროექტში მონაწილე ბანკები ქვეყნის კომერციული საბანკო სექტორის აქტივების უდიდეს ნაწილს წარმოადგენენ.

„ბოლო 5 წლის განმავლობაში საქართველოს კომერციული საბანკო სექტორი ხასიათდებოდა ორნიშნა ზრდით, ხოლო საერთო აქტივები 38 მილიარდ აშშ დოლარს უახლოვდება. სექტორის მასშტაბების ზრდასთან ერთად, გაიზარდა მოთხოვნა უფრო კომპლექსურ სახაზინო ინფრასტრუქტურაზე, რომელსაც შეუძლია ფასიანი ქაღალდებისა და დერივატივების ბაზრების მხარდაჭერა, კორპორაციული დონის რისკების მართვა და საერთაშორისო მარეგულირებელ სტანდარტებთან შესაბამისობის უზრუნველყოფა“, - აღნიშნულია ეროვნული ბანკის განცხადებაში.

მარეგულირებლის შეფასებით, მსგავსი ინფრასტრუქტურის ცალკეულ ბანკებში დამოუკიდებლად დანერგვა მნიშვნელოვან ინვესტიციებსა და რესურსებს მოითხოვს, ხოლო საერთო პლატფორმის გამოყენება სექტორის მასშტაბით გამოცდილებისა და რესურსების გაზიარების შესაძლებლობას ქმნის.

საქართველოს ეროვნული ბანკის პრეზიდენტის ნათია თურნავას განცხადებით, სახაზინო ინფრასტრუქტურის მოდერნიზაცია ეროვნული ბანკის ერთ-ერთი სტრატეგიული პრიორიტეტია.