"თხილის მოსავლის დაახლოებით 10%-იან კლებას ველოდებით" - ბაია სალუქვაძე

"წელს თხილის მოსავლის დაახლოებით 10%-იანი კლებას ველით", - ამის შესახებ კომპანიების “ბლუ ბერდ ბერიზ"-ისა და GPR Nuts-ის დამფუძნებელმა ბაია სალუქვაძემ BMGTV-ის ეთერში “ქალების ნარატივი” განაცხადა.

მისი თქმით, 2025 წელს საქართველოში დაახლოებით 45 000 ტონა თხილის მოსავალი მიიღეს, თუმცა მიმდინარე სეზონზე წინასწარი შეფასებით, მოსავლის შემცირებას ელიან.

„თუ ვამბობთ, რომ დაახლოებით 45 000 ტონა გვაქვს მთელი წლის მოსავალი, წელს არის ვარაუდი, რომ დაახლოებით 10%-იანი კლება იქნება. თუმცა, ეს ძალიან ნაადრევია. ეს ყველაფერი გამოჩნდება შემდგომ, როდესაც უკვე გაშრება თხილი, გატყდება და ექსპორტზე გაიგზავნება მოსავალი“, - განაცხადა სალუქვაძემ.

მისივე თქმით, მიმდინარე სეზონზე თხილის ხარისხზე უარყოფითად მოქმედებს როგორც ამინდი, ისე მავნებლები. განსაკუთრებით პრობლემურია ფაროსანა, რომლის წინააღმდეგაც წლის განმავლობაში გეგმური წამლობები მიმდინარეობდა.

„გაჭიანურებულმა წამლობებმა უამინდობის გამო კიდევ უფრო მეტი ბიძგი მისცა, რომ ფაროსანა და სხვა მწერები გამოჩენილიყვნენ. ეს, რასაკვირველია, აისახება ხარისხზე. უკვე თხილში საკმაოდ დიდი რაოდენობის დეფექტი გვხვდება, მწერის ნაჭამი და აქედან გამომდინარე ხარისხობრივი მაჩვენებლები ჯერჯერობით არ არის დამაკმაყოფილებელი“, - აღნიშნა მან.