ტრამპმა AI-ინდუსტრიასთან დაკავშირებით ახალ განკარგულებას მოაწერა ხელი

პრეზიდენტმა დონალდ ტრამპმა ხელი მოაწერა აღმასრულებელ განკარგულებას, რომელიც ხელოვნური ინტელექტის სფეროში ინოვაციების წახალისებასა და უსაფრთხოების გაძლიერებას ისახავს მიზნად.

თეთრი სახლის ინფორმაციით, დოკუმენტი ფედერალურ უწყებებს მოწინავე AI მოდელებისთვის კიბერუსაფრთხოების სტანდარტების შემუშავებას ავალებს. ახალი სტრატეგიის ფარგლებში, განსაკუთრებული ყურადღება სამთავრობო სტრუქტურებში კიბერდაცვის მექანიზმების გაუმჯობესებას დაეთმობა.

არსებული ინფორმაციით, ვაშინგტონი მიზნად ამერიკული ტექნოლოგიური დომინირების განმტკიცებასა და ინოვაციების ბიუროკრატიული ბარიერებისგან დაცვას ისახავს.

მნიშვნელოვანია ითქვას, რომ განკარგულება აშშ-ის ფინანსთა მინისტრს ხელოვნური ინტელექტის კიბერუსაფრთხოების საინფორმაციო ცენტრის შექმნას ავალებს. ეს სტრუქტურა კერძო სექტორთან და კრიტიკული ინფრასტრუქტურის ოპერატორებთან მოხალისეობრივი პრინციპით ითანამშრომლებს.

რაც შეეხება ტექნოლოგიურ რეგულაციებს, განკარგულება უსაფრთხოების კლასიფიცირებული კრიტერიუმების შექმნას ითვალისწინებს. სპეციალური კომისია დაადგენს ზღვარს, რომლის მიხედვითაც კონკრეტულ მოდელებს განსაკუთრებული კონტროლის სტატუსი მიენიჭებათ. დოკუმენტის მიხედვით, მწარმოებლებს შეეძლებათ ნებაყოფლობით საფუძველზე წარადგინონ თავიანთი პროდუქტები სახელმწიფო შემოწმებისთვის ბაზარზე ოფიციალურ გაშვებამდე 30 დღით ადრე.

საგულისხმოა, რომ ახალი ინიციატივა მკაცრად კრძალავს სამთავრობო ლიცენზირების ან სავალდებულო წინასწარი ნებართვების სისტემის შემოღებას. დოკუმენტში ხაზგასმითაა აღნიშნული, რომ თეთრი სახლი უარს ამბობს ინოვაციების გადაჭარბებული ბიუროკრატიული რეგულაციებით შეფერხებაზე.

ამასთან, სამართლებრივი დევნის მექანიზმები მკაცრდება იმ პირების მიმართ, რომლებიც ხელოვნურ ინტელექტს კიბერდანაშაულისთვის გამოიყენებენ. ქვეყნის გენერალურ პროკურორს დაევალა პრიორიტეტულად აღკვეთოს AI-აგენტების მეშვეობით კომპიუტერულ სისტემებში უკანონო შეღწევისა და მონაცემთა მითვისების მცდელობები.

განკარგულების მიხედვით, სამთავრობო გრანტების ნაწილი მიზნობრივად იმ დეველოპერებისკენ მიიმართება, რომლებიც ხარვეზების აღმომჩენ მოწინავე ტექნოლოგიებს ქმნიან.