Economist: დონალდ ტრამპის მხარდაჭერის რეიტინგი ისტორიულ მინიმუმამდეა დაცემული

Economist/YouGov-ის ახალი გამოკითხვის თანახმად, პრეზიდენტ დონალდ ტრამპის მხარდაჭერის რეიტინგი, მეორე ვადით თეთრ სახლში დაბრუნების შემდეგ, რეკორდულ მინიმუმამდე დაეცა - მოსახლეობის მხოლოდ 35% იწონებს მის საპრეზიდენტო საქმიანობას.

გამოკითხვა 25-27 ივლისს 1,559 სრულწლოვანს შორის ჩატარდა.

დონალდ ტრამპის საპრეზიდენტო ვადის 555-ე დღეს, პრეზიდენტის მოწონების ჯამური რეიტინგი -25-ს შეადგენს, რაც ნიშნავს, რომ 35% იწონებს და 60% არ იწონებს მის საქმიანობას. გამოკითხულთა 4% არ არის ჩამოყალიბებული.

მიმდინარე თვის სხვადასხვა გამოკითხვის შედეგების პროცენტული მაჩვენებლები ერთმანეთისგან განსხვავდება, თუმცა არც ერთი კვლევით პრეზიდენტის მხარდაჭერა 40% არ ცდება. 23 ივლისს გამოქვეყნებული Pew Research Center-ის თანახმად, ტრამპის მოწონების რეიტინგმა 34% შეადგინა, Washington Post-ის კვლევით 37%. Emerson College და Fox News-ზე დაყრდნობით, ტრამპის რეიტინგი 39%-ს შეადგენს.

Economist-ის შეფასებით, მხარდაჭერის დაბალი მაჩვენებლების ერთ-ერთი მთავარი მიზეზი ადმინისტრაციის მიერ ივლისის შუა რიცხვებში ირანზე დარტყმების განახლებაა. მათი გამოკითხვა აჩვენებს, რომ 60%-ის აზრით, ადმინისტრაცია კონფლიქტზე ზედმეტად დიდ თანხას ხარჯავს.

ყველაზე მკაფიო ვარდნა ტრამპის მხარდაჭერის რეიტინგში ინფლაციის გარშემო ჩანს. ინფლაციასა და ფასებთან გამკლავების საკითხში ტრამპის მოწონების წმინდა რეიტინგი -43-ს შეადგენს, რაც ყველაზე დაბალი მაჩვენებელია ამ ვადის განმავლობაში. მიზეზად ამ შემთხვევაშიც ირანთან ომი და შედეგად საწვავის ფასების დრამატული ზრდაა.

გამოკითხვამ ასევე აჩვენა, რომ ამერიკელთა 63% ამბობს, რომ ქვეყანა არასწორი მიმართულებით მიდის.