ტრამპმა განაცხადა, რომ ირანში ბირთვული იარაღის გამოყენებასა და ჯარების შეყვანას არ გეგმავს

აშშ-ის პრეზიდენტმა დონალდ ტრამპმა ირანის წინააღმდეგ ბირთვული იარაღის გამოყენების ან ქვეყანაში სახმელეთო ჯარების შეყვანის შესაძლებლობა გამორიცხა.

ტელეკომპანია Newsmax-თან ინტერვიუში თეთრი სახლის ლიდერმა აღნიშნა, რომ ვაშინგტონს მსგავსი ნაბიჯის გადადგმის საჭიროება არ აქვს. მისი განცხადებით, ამერიკის შეერთებული შტატები მსოფლიოში უდიდესი ბირთვული სახელმწიფოა, თუმცა თეირანის წინააღმდეგ ამ არსენალის გამოყენებას არ აპირებს.

ინტერვიუს დროს ტრამპმა პირდაპირ უპასუხა სახმელეთო ოპერაციის შესაძლებლობის შესახებ დასმულ შეკითხვასაც და განაცხადა, რომ ირანის ტერიტორიაზე ამერიკელი სამხედროების გაგზავნას არ გეგმავს.

აღსანიშნავია, რომ ამ განცხადებებს წინ უძღოდა ტელეკომპანია CNN-ის მიერ გავრცელებული ცნობები, რომელთა თანახმადაც, თეთრი სახლი ირანულ სამიზნეებზე შესაძლო იერიშებისთვის არაბირთვული ტიპის GBU-43/B-ს, იგივე „ყველა ბომბის დედას“ განიხილავდა.

საყურადღებოა, რომ ამ საკითხზე საუბრისას ტრამპმა იარაღის შესაძლო გამოყენების ფაქტი პირდაპირ არც დაადასტურა და არც უარყო. პრეზიდენტის თქმით, აღნიშნული საბრძოლო მასალა ბირთვულ კატეგორიას არ მიეკუთვნება. მან განმარტა, რომ ის უბრალოდ უპრეცედენტო მასშტაბის ჩვეულებრივი ბომბია, რომლის სიმძლავრეც მცირე ზომის ბირთვულ მუხტს უტოლდება.

ცნობისთვის, GBU-43/B ამერიკის შეერთებული შტატების სამხედრო არსენალში ყველაზე მძლავრი არაბირთვული ბომბია. ვაშინგტონმა ეს იარაღი საბრძოლო პირობებში 2017 წელს, ავღანეთში მოქმედი ტერორისტული დაჯგუფება „ისლამური სახელმწიფოს“ მებრძოლების წინააღმდეგ გამოიყენა.