"ტრანსფორმაციის პროცესი არ არის მარტივი" - MBC მიკრობანკად გარდაქმნაზე

"ემბისის" გენერალური დირექტორი გია პეტრიაშვილი ამბობს, რომ მიკრობანკად ტრანსფორმაცია მარტივი არ არის, თუმცა ამის მიუხედავად, კომპანიამ ამ პროცესის დაგეგმილზე უკეთესი შედეგებით გავლა შეძლო. მან ამის შესახებ "საქმიანი დილის" ეთერში განაცხადა.

2024 წლის 5 დეკემბერს "ემბისიმ" (MBC) პირველმა მიიღო მიკრობანკის ლიცენზია საქართველოს ეროვნული ბანკისგან.

მან ამ პროცესში გამოწვევებზე საუბრისას გაციფრულებაზე და ამ მიმართულებით არსებულ გეგმებზე გაამახვილა ყურადღება.

"ვამაყობთ, რომ ვართ პირველი მიკრობანკი, ვინც მოიპოვა ეს ლიცენზია. ძალიან ბევრი გამოწვევა გვაქვს, რა თქმა უნდა, იმიტომ რომ ეს ტრანსფორმაციის პროცესი არ არის მარტივი, იმიტომ რომ უნდა მოხდეს სრულად გარდაქმნა საბანკო დაწესებულებად. მიუხედავად ამისა, ჩვენ მიგვაჩნია, რომ პირველი წელი პირდაპირ ვიტყვი, იმაზე უკეთ გავიარეთ, ვიდრე თავიდან ვგეგმავდით. ეს არის 25%-იანი ზრდა ჩვენი აქტივების და პორტფელის. ეს არის ჩვენი მოგებიანობის საკმაოდ მაღალ ნიშნულზე დაფიქსირება და შეგვიძლია ვთქვათ, რომ საბანკო სექტორში შევდივართ პირველ სამეულში ან ოთხეულში, ასეთი მაღალი მომგებიანობით.

მთავარი გამოწვევა ჩვენთვის არის იმ სერვისების განვითარება, რაც მომხმარებელს გაუადვილებს და კომფორტულს გახდის მისთვის ახალი პროდუქტების მიღებას. ეს პირველ რიგში არის ანაბრები, ეს არის მიმდინარე ანგარიშები და რა თქმა უნდა, მე ვსაუბრობ ციფრულ ტექნოლოგიებზე. გაციფრულება არის ის მთავარი გამოწვევა და ამ მიმართულებით კომპანია არ ზოგავს ახლა ინვესტიციებს და მათ შორის შრომით რესურსებსაც ძალიან აქტიურად ვიზიდავთ, რომ რაც შეიძლება სწრაფად მოხდეს ჩვენი სერვისების გაციფრულება და მომხმარებლის ურთიერთობა ჩვენთან გახდეს რაც შეიძლება კომფორტული და ადვილი. აქ მინდა აღვნიშნო ერთი გარემოება, რომ გაციფრულება არ ნიშნავს ადამიანური ურთიერთობის რაღაცა ტექნოლოგიებით ჩანაცვლებას. ძალიან კარგად გვესმის, რომ ჩვენი ღირებულება ჩვენი მომხმარებლისთვის განსაკუთრებული გარემოა, ის VIP დამოკიდებულება, რაც მიკრო მეწარმეებს შეიძლება ჰქონდეთ მიკრობანკში, განსხვავებით მსხვილი კომერციული ბანკისა. ჩვენ ამას ძალიან ვუფრთხილდებით",- აღნიშნა გია პეტრიაშვილმა.

მან ბაზარზე ზოგადად არსებული მდგომარეობის შეფასებისას განაცხადა, რომ მოთხოვნა როგორც საკრედიტო, ისე არასაკრედიტო პროდუქტებზე საკმაოდ მაღალია.