წელს, რაჭაში სეზონი დაახლოებით ერთი თვის დაგვიანებით დაიწყო - "კესანე არ დამივიწყო"
ტურისტული ობიექტის „კესანე არ დამივიწყოს“ დამფუძნებლის, გვანცა ყრუაშვილის განცხადებით, წელს სეზონი დაახლოებით ერთი თვით დაგვიანებით დაიწყო. როგორც მან BMGTV-ის გადაცემაში „ქალების ნარატივი“ აღნიშნა, დაგვიანება რამდენიმე ფაქტორმა განაპირობა, მათ შორის ახალი სივრცის დამატებამ, სარემონტო სამუშაოებმა და უამინდობამ.
"სეზონი 9 მაისიდან დაიწყო, თუმცა ფაქტორების გამო დაახლოებით ერთი თვით დაგვიანდა. დავამატეთ ახალი ღია სივრცე და ტერასა, რაც სარემონტო სამუშაოებს საჭიროებდა. ამასთან, უამინდობამაც პროცესები გაახანგრძლივა", - განაცხადა გვანცა ყრუაშვილმა.
მისი თქმით, მიმდინარე წელს ობიექტი სტუმრებს განახლებული კონცეფციით ხვდება და მიზნად ისახავს მაქსიმალურად მეტი ვიზიტორის მიღებას : "ჩვენთვის ეს სივრცე მხოლოდ ბიზნესი არ არის - ეს ბავშვობის, მოგონებების და რაჭასთან დაკავშირებული ემოციების ნაწილია. სწორედ ამ დამოკიდებულებას ვცდილობთ გადავცეთ სტუმრებსაც - როგორც მომსახურებით, ისე ადგილობრივი კერძებით“, - აღნიშნა მან.
ყრუაშვილის შეფასებით, რეგიონში ტურიზმის მთავარ გამოწვევად მოკლე სეზონი რჩება, რომელიც ძირითადად ივლის-სექტემბერზე კონცენტრირდება. მისი თქმით, მაისი, როგორც წესი, უცხოელი ვიზიტორების პერიოდია, თუმცა წელს ადგილობრივი ტურისტების ნაკადი შემცირებულია, რაც ნაწილობრივ ამინდებსაც უკავშირდება.
„ტურიზმი ძალიან სენსიტიური სფეროა და ყველა დეტალზე რეაგირებს. წელს მაისში ადგილობრივი ვიზიტორები შედარებით ნაკლებია, თუმცა აქტიურობენ უცხოელი ტურისტები. განსაკუთრებით, ისრაელიდან, პოლონეთიდან და უკრაინიდან“, - განაცხადა ყრუაშვილმა და დასძინა, რომ ბიზნესისთვის მნიშვნელოვანია უფრო ხანგრძლივი ტურისტული სეზონი, რაც რეგიონის განვითარებასაც ხელს შეუწყობს.
ცნობისთვის, სტუმარმასპინძლობის მულტიფუნქციური სივრცე „კესანე - არ დამივიწყო“ 2023 წლის 1 ივლისს გაიხსნა და მომხმარებლებს ადგილობრივი მეწარმეების ღვინოსა და ტრადიციულ ქართულ კერძებს სთავაზობს.