წლის ბოლომდე აუცილებლად დავუბრუნდებით მოლაპარაკების მაგიდას | APM Terminals ფოთის პორტის გაფართოების პროექტზე

ფოთის პორტი ამჟამად საოპერაციო მოცულობების ზღვარზე იმყოფება, რაც გაფართოების პროექტის დაჩქარების აუცილებლობას წარმოშობს. ამის შესახებ BMG-სთან „ფოთის საზღვაო ნავსადგურის“ ადმინისტრაციის ხელმძღვანელი ზვიად ჩხარტიშვილი საუბრობს.

მისივე თქმით, ფოთის პორტის გაფართოების პროექტი სრულად კერძო ინვესტიციაა და სახელმწიფო აქ მხოლოდ პარტნიორის როლშია, რაც ნიშნავს, რომ პროექტი გადასახადების გადამხდელების ფინანსურ რესურსს არ საჭიროებს.

„მიმდინარე ეტაპზე მცირე ინვესტიციებით და მუდმივი გაუმჯობესების პროცედურებით, ჩვენ ვახერხებთ რომ ტვირთნაკადს გავუმკლავდეთ, მაგრამ აგრეთვე, უნდა აღინიშნოს, რომ გამტარუნარიანობის ზღვარზე ვიმყოფებით. შესაბამისად, ეს გვაძლევს ჩვენ იმ შესაძლებლობას, დავარწმუნოთ ჩვენი პარტნიორები, რომ აუცილებელი და დასაჩქარებელია ფოთის პორტის გაფართოება.

ამასთან, მარტივად დათვლადია, რომ როდესაც მცირე მოცულობის ტვირთია და ხარჯი არის დიდი - ტარიფი უნდა იყოს მაღალი. როდესაც მოცულობა მოიმატებს (ჩვენ ისედაც ვცდილობთ რომ ხარჯები შევამციროთ), რა თქმა უნდა, ეს წაადგება უკვე სატარიფო პოლიტიკას“, - განმარტავს ზვიად ჩხარტიშვილი.

მისივე თქმით, გასათვალისწინებელია კასპიის ზღვის აუზის ქვეყნების აქტივობაც - აქთაუს, თურქმენბაშისა და ბაქოს პორტებში უკვე განხორციელდა სერიოზული ინვესტიციები, რასაც საქართველომ ადეკვატური ინფრასტრუქტურული პასუხით უნდა უპასუხოს.

„აღმოსავლეთ-დასავლეთის ავტომაგისტრალის განვითარება, რკინიგზის მოდერნიზაცია და საბაჟო პროცედურების გაციფრულება - ეს ყველაფერი პორტების განვითარებასთან ერთად ერთიან ჭრილში უნდა განვიხილოთ. მხოლოდ ასე შევძლებთ საქართველოს, როგორც დერეფნის უმნიშვნელოვანესი რგოლის, სიმძლავრეების გაზრდას.

ჩვენ საოპერაციო მოცულობების ზღვარზე ვიმყოფებით. APM Terminals-ი ერთი მხრივ, მუდმივი გაუმჯობესების პროცედურების დანერგვით უმკლავდება გაზრდილ მოცულობებს. აგრეთვე, ჩვენ დავაანონსეთ, რომ დამატებითი ინვესტიციის ჩადება - ერთი მხრივ, შევიძინეთ დამატებითი ტერიტორია ფოთის პორტთან სიახლოვეს და მეორე მხრივ, დამატებითი ამწე შევიძინეთ, რომლითაც, შეგვიძლია 50 000 TEU მოცულობით შევმატოთ არა მხოლოდ პორტის, არამედ მთლიანად შუა დერეფნის გამტარუნარიანობას. წლის ბოლოს ჩვენ უკვე 650 000 TEU გამტარუნარიანობას მივაღწევთ“, - ამბობს ჩხარტიშვილი BMG-სთან.

მისივე ცნობით, ფოთის საზღვაო ნავსადგურსა და ეკონომიკისა და მდგრადი განვითარების სამინისტროს შორის კონსულტაციები გრძელდება და წლის ბოლომდე მხარეები მოლაპარაკების მაგიდასთან დაბრუნდებიან, რათა საბოლოოდ შეთანხმდნენ პორტის მასშტაბური გაფართოების დეტალებზე.