ცნობილია რა ეღირება თბილისი-ბაქოს მატარებლის ბილეთი

აზერბაიჯანის რკინიგზამ ბაქო-თბილისი-ბაქოს რეგულარული სამგზავრო მიმოსვლის აღდგენის შესახებ გამოაქვეყნა განცხადება. კომპანიის ინფორმაციით, ბაქოდან თბილისის მიმართულებით მატარებელი 23:10-ზე გავა და თბილისში მეორე დღეს 08:41-ზე ჩამოვა, ხოლო თბილისიდან ბაქოს მიმართულებით მატარებელი 21:00-ზე გავა და ბაქოში მეორე დღეს 06:24 საათზე ჩავა. მატარებელი საქართველოში თბილისის გარდა გარდაბანში გაჩერდება, ხოლო აზერბაიჯანში კი მატარებელი გაჩერდება ბაქოს რკინიგზის სადგურზე, ბილაჯარში, ევლახში, განჯაში, აღსტაფასა და ბოიუქ კასიკში.

აზერბაიჯანის რკინიგზის თანახმად, ბაქოდან თბილისის მიმართულებით ბილეთის მინიმალური ფასი იქნება 81 მანათი, რაც 127 ლარს შეადგენს, ამასთან, აზერბაიჯანიდან თბილისის მიმართულებით ბილეთის ფასი ყველაზე მოკლე მარშრუტის შემთხვევაში 51 მანათი, ანუ 80 ლარი იქნება, თუმცა სრული მარშრუტის - ბაქო-თბილისის საფასური 81 მანათიდან იწყება. ანალოგიურად, თბილისიდან ბაქოს მიმართულებით ბილეთის საფასურიც 81 მანათი იქნება.

სამგზავრო მიმოსვლა 26 მაისიდან აღდგება, რეისები Stadler-ის სამგზავრო შემადგენლობით შესრულდება, რომელიც აზერბაიჯანის რკინიგზამ რამდენიმე წლის წინ შეიძინა.

აზერბაიჯანის რკინიგზის ინფორმაციით, სასაზღვრო პროცედურებისთვის თითოეულ საზღვარზე 1 საათი არის გათვალისწინებული.