თუ მარკეტების დაწესებული გადასახადები შემცირდება, ეს მიწოდების ფასში აისახება - დისტრიბუტორები "საოჯახო კალათის" ინიციატივაზე

თუკი სავაჭრო ქსელების მხრიდან დისტრიბუტორებისთვის და მწარმოებლებისთვის დაწესებული სხვადასხვა ტიპის გადასახადები შემცირდება, ეს საბოლოო მიწოდების ფასში აისახება - ასე ეხმიანება დისტრიბუტორთა ბიზნეს ასოციაცია რითეილ სექტორის ინიციატივას “საოჯახო კალათასთან” დაკავშირებით.

საქმე ისაა, რომ „რითეილ ასოციაციის“ წევრი კომპანიები აცხადებენ, რომ იწყებენ სავაჭრო ქსელებში “საოჯახო კალათის” ინიციატივის განხორციელებას, რაც მარკეტებში მათ მიერვე შერჩეულ პროდუქტებზე მუდმივ რეჟიმში სპეციალური ფასების პოლიტიკის ამოქმედებას გულისხმობს. თუმცა გაერთიანებაში ასევე აღნიშნავენ, რომ მნიშვნელოვანია, ამ პროცესში ჩაერთონ როგორც მწარმოებლები, ასევე დისტრიბუტორები.

როგორც ასოციაციის ხელმძღვანელმა BMG-ის განუცხადა, სავაჭრო ქსელებში დღეს არსებული ფასდაკლებების ძირითადი ნაწილი ისედაც დისტრიბუტორების და მწარმოებლების ხარჯზე ხორციელდება. შესაბამისად, დამატებით პროდუქციის მიწოდების ფასის შემცირებისთვის აუცილებელია, თავად მარკეტებმა დააკორექტირონ მათ მიერ დაწესებული სხვადასხვა ტიპის გადასახადები.

“პირველ რიგში უნდა აღინიშნოს ერთი რამ, რომ ის ფასდაკლება, რომელსაც ხედავს მომხმარებელი თაროზე, მეტწილად და ძირითად შემთხვევაში ისედაც დისტრიბუტორის და მწარმოებლის ხარჯზე ხორციელდება. ანუ რა ფასდაკლებაც მომხმარებელს თაროზე ხვდება, არის ის ფინანსური ტვირთი, რომელსაც ისედაც დისტრიბუტორი და ადგილობრივი მწარმოებელი იღებს.

რაც შეეხება დამატებით კიდევ [ფასდაკლებებს], ნებისმიერი ცვლილება ქსელური მარკეტების მიერ დაწესებულ გადასახადებთან მიმართებით, პირდაპირპროპორციულად შეგვიძლია ავსახოთ მიწოდების ფასში, რაც შეამცირებს მომხმარებლისთვის მის [პროდუქციის] ღირებულებას. გამომდინარე იქიდან, რომ გამოუთავისუფლდება სადისტრიბუციო კომპანიას და ადგილობრივ მწარმოებელს ფინანსური საბრუნავი საშუალებები, რაც კიდევ უფრო მეტი, დაბალი ფასით მიწოდების შესაძლებლობას მისცემს.