თურქეთის სასამართლომ ნეთანიაჰუს დაკავების საერთაშორისო ორდერი გამოსცა

სტამბოლის სასამართლომ ისრაელის პრემიერ-მინისტრის, ბენიამინ ნეთანიაჰუს დაკავების საერთაშორისო ორდერი გამოსცა.

სასამართლოს მიერ მიღებული შუალედური გადაწყვეტილება მიმდინარე სასამართლო პროცესის ნაწილია, რომელიც ღაზის სექტორისაკენ მიმავალ ჰუმანიტარულ გემთა ქარავანზე ისრაელის სამხედრო ძალების მიერ განხორციელებულ იერიშს ეხება.

არსებული ინფორმაციით, სამართლებრივი დევნა ნეთანიაჰუსა და ისრაელის რამდენიმე მაღალჩინოსნის წინააღმდეგ აღძრული ფართომასშტაბიანი საჯარო სარჩელის საფუძველზე დაიწყო, რომელიც ბრალდებულებს კაცობრიობის წინააღმდეგ ჩადენილ დანაშაულში, გენოციდში, სხეულის განზრახ დაზიანებასა და წამებაში ადანაშაულებს.

ამასთან, ბრალდების მხარე ისრაელის ლიდერებს კერძო საკუთრების განადგურებას, დამამძიმებელ გარემოებებში ძარცვას, სატრანსპორტო საშუალებების გადაადგილების ხელშეშლას, გემების გატაცებასა და ადამიანებისათვის თავისუფლების უკანონო აღკვეთას ედავება.

მნიშვნელოვანია ითქვას, რომ სტამბოლის სასამართლომ ნეთანიაჰუსა და ათობით სხვა თანამდებობის პირის დაკავების პირველადი ორდერები ჯერ კიდევ 2025 წლის ნოემბერში, გემებზე თავდასხმისა და ღაზის სექტორში განხორციელებული საომარი მოქმედებების საპასუხოდ გამოსცა.

ამასთან, ახალი "წითელი ცირკულარის" გამოცემით სასამართლომ დასახელებული ბრალდებების აღსასრულებლად საერთაშორისო მექანიზმებიც ოფიციალურად აამოქმედა.