უკანონო პატიმარი ჟურნალისტების, მათ შორის მზია ამაღლობელის, გათავისუფლების მოთხოვნით სენატში რეზოლუცია დარეგისტრირდა

სენატში 2026 წლის 3 მაისს "პრესის თავისუფლების მსოფლიო დღესთან" დაკავშირებით ახალი რეზოლუცია დარეგისტრირდა, რომლითაც სენატი აღიარებს მთელ მსოფლიოში პრესისა და სიტყვის თავისუფლების წინააღმდეგ მიმართულ მზარდ საფრთხეებს, მათ შორის კონფლიქტურ ზონებსა და რეპრესიული რეჟიმების პირობებში მომუშავე ჟურნალისტებზე გახშირებულ თავდასხმებს.

დოკუმენტში გასული წლების განმავლობაში გლობალურად პრესის თავისუფლების უკუსვლასა და იმ სტატისტიკურ მონაცემებზეა საუბარი, რომლებიც მსოფლიოს მასშტაბით მოკლული, გატაცებული თუ დაპატიმრებული ჟურნალისტების რაოდენობას ასახავს.

რეზოლუციაში მოხსენიებულია მზია ამაღლობელიც.

"სენატი ადასტურებს თავისუფალი და დამოუკიდებელი პრესის სასიცოცხლო როლს დემოკრატიის დაცვის, ეკონომიკური კეთილდღეობის ხელშეწყობისა და საზოგადოების ინფორმირების საქმეში; ასევე, ადასტურებს, რომ დემოკრატიის, ადამიანის უფლებებისა და კარგი მმართველობის მხარდაჭერის პროცესში პრესის თავისუფლება შეერთებული შტატების მთავრობის პრიორიტეტს წარმოადგენს.

"ჟურნალისტთა დაცვის კომიტეტის" (CPJ) მონაცემებით, 2025 წლის ბოლოს, ზედიზედ მეხუთე წელია, რაც მსოფლიოს მასშტაბით 300-ზე მეტი ჟურნალისტია დაპატიმრებული, მათ შორის: ჟანგ ჟანი ჩინეთის სახალხო რესპუბლიკაში, იერის კურბელო აგილერა კუბაში, მზია ამაღლობელი საქართველოში, „რადიო თავისუფლების“ (RFE/RL) ჟურნალისტი ნიკა ნოვაკი რუსეთში, RFE/RL-ის ჟურნალისტი ფარიდ მეჰრალიზადა აზერბაიჯანში და RFE/RL-ის ყოფილი ჟურნალისტი, აშშ-ისა და ირანის ორმაგი მოქალაქეობის მქონე რეზა ვალიზადე ირანში", - ვკითხულობთ დოკუმენტში.

რეზოლუციით სენატი:

1. აცხადებს, რომ თავისუფალი პრესა:

• წარმოადგენს თავისუფალი საზოგადოებებისა და დემოკრატიული მმართველობის ცენტრალურ კომპონენტს; • ხელს უწყობს ინფორმირებული სამოქალაქო საზოგადოების ჩამოყალიბებასა და მთავრობის ანგარიშვალდებულებას; • ეხმარება კორუფციის გამოვლენაში; • აძლიერებს საჯარო ანგარიშვალდებულებასა და მთავრობების გამჭვირვალობას ყველა დონეზე; • ავრცელებს ინფორმაციას, რომელიც არსებითად მნიშვნელოვანია საზოგადოებრივი ჯანმრთელობისა და უსაფრთხოების გასაუმჯობესებლად.