უკრაინის რადამ საომარი მდგომარეობა და მობილიზაცია ოქტომბრის ბოლომდე გაახანგრძლივა

უკრაინის უმაღლესმა რადამ საომარი მდგომარეობისა და საყოველთაო მობილიზაციის ვადის 2026 წლის 31 ოქტომბრამდე გაგრძელებას მხარი დაუჭირა.

როგორც ირკვევა, ქვეყნის საკანონმდებლო ორგანომ პრეზიდენტ ვოლოდიმირ ზელენსკის მიერ წარდგენილი შესაბამისი საკანონმდებლო ინიციატივები უკვე მეოცედ დაამტკიცა. სახელმწიფოს მეთაურის ეს გადაწყვეტილება მიზნად საომარი მოქმედებების პირობებში ქვეყნის მართვის ეფექტიანობის შენარჩუნებას ისახავს. მიღებული დადგენილებით, ქვეყანაში მოქმედი საგანგებო სამართლებრივი რეჟიმი მიმდინარე წლის 2 აგვისტოდან კიდევ 90 დღით გახანგრძლივდა.

მნიშვნელოვანია ითქვას, რომ თუ საომარი მდგომარეობის გახანგრძლივების კანონპროექტს მხარი 313 დეპუტატმა დაუჭირა, საყოველთაო მობილიზაციის შესახებ მეორე კანონპროექტს ხმა ზელენსკის პარტიის 2-მა წევრმა არ მისცა და ჯამურად მხოლოდ 311 დეპუტატის მხარდაჭერით გავიდა. თუმცა ისიც უნდა ითქვას, რომ ორივე გადაწყვეტილება ხმათა აბსოლუტური უმრავლესობით დამტკიცდა.

ცნობისთვის, უკრაინაში საომარი მდგომარეობა და საყოველთაო მობილიზაცია 2022 წლის 24 თებერვლიდან მოქმედებს.