უკრაინისთვის მსოფლიო ბანკის €236-მილიონიანი სესხის გარანტორი შვედეთი იქნება

შვედეთის მთავრობამ მიიღო გადაწყვეტილება, მსოფლიო ბანკს მეორე გარანტია მისცეს, რაც უკრაინას დაახლოებით 2.5 მილიარდი შვედური კრონის (236 მლნ ევრო) ოდენობის სესხის მიღების საშუალებას მისცემს.

შვედეთის მთავრობის განცხადებით, სესხი, სხვა საჭიროებებთან ერთად, უკრაინის სახელმწიფო ბიუჯეტში რუსეთის სრულმასშტაბიანი შეჭრით გამოწვეული აუცილებელი სახელმწიფო ხარჯების დასაფარად იქნება გამოყენებული.

„უკრაინა დაფინანსების როგორც მყისიერი, ისე გრძელვადიანი გამოწვევების წინაშე დგას. ამიტომ შვედეთი ევროკავშირისა და მსოფლიო ბანკის მეშვეობით მას საბიუჯეტო მხარდაჭერას უწევს. ვამაყობ, რომ ამ გარანტიით შვედეთი უკრაინას ომის მიუხედავად აუცილებელი სახელმწიფო სერვისების შენარჩუნებაში ეხმარება. ეს გარანტია არის ინვესტიცია არა მხოლოდ უკრაინის მომავალსა და თავისუფლებაში, არამედ ევროპისა და შვედეთის მომავალშიც“, - განაცხადა საერთაშორისო განვითარების თანამშრომლობისა და საგარეო ვაჭრობის მინისტრმა ბენჯამინ დუსამ.

ეს გადაწყვეტილება შვედეთის პარლამენტის მიერ მიმდინარე წლის დასაწყისში გაცემული ავტორიზაციის საფუძველზე მიიღეს, რაც მთავრობას 2026 წელს საგარანტიო ხელშეკრულებების გაფორმების უფლებას აძლევს.

როგორც ცნობილია, გარანტია მსოფლიო ბანკს მიეცემა, რაც უკრაინას ბანკის მხარდაჭერის პროგრამის, PEACE-ის ფარგლებში სესხების მიღების საშუალებას მისცემს. სხვა საკითხებთან ერთად, პროგრამა პენსიებს, საჯარო სექტორში დასაქმებულთა ხელფასებს და ეკონომიკურად მოწყვლადი ჯგუფებისა თუ იძულებით გადაადგილებული პირების დახმარებას აფინანსებს.

ახალი გარანტიის ჩათვლით, შვედეთის მიერ უკრაინის დაკრედიტებისთვის მსოფლიო ბანკისთვის მიცემული ჯამური გარანტიები დაახლოებით 280 მილიონ ევროს შეადგენს. გარანტია 2056 წლამდე იქნება ძალაში და ის გრძელვადიან ვალდებულებას წარმოადგენს.