უკრაინული დრონების იერიშის შემდეგ აფსკის ნავთობქარხანაში ხანძარი გაჩნდა
რუსეთის კრასნოდარის მხარეში მდებარე აფსკის ნავთობგადასამუშავებელ ქარხანაზე უპილოტო საფრენი აპარატებით მორიგი თავდასხმა განხორციელდა, რამაც საწარმოს ტერიტორიაზე ძლიერი ხანძარი გამოიწვია.
The Moscow Times-ის ინფორმაციით, აფეთქებების ხმა ქარხნის მიმდებარედ დაახლოებით შუაღამისას გაისმა, რის შემდეგაც ცეცხლი საწარმოს რეზერვუარების პარკის ტერიტორიაზე გავრცელდა. ადგილობრივი საგანგებო შტაბის მონაცემებით, შემთხვევის შედეგად სხეულის დაზიანება ორმა ადამიანმა მიიღო. ამ დროისათვის შემთხვევის ადგილზე ლიკვიდაციის სამუშაოები უკვე დასრულებულია.
აფსკის ნავთობგადასამუშავებელი ქარხანა რუსეთის სამხრეთ ნაწილში ერთ-ერთი უმსხვილესი საწარმოა, რომელიც ბენზინს, დიზელის საწვავს, გაზის კონდენსატის დისტილატებსა და გოგირდს აწარმოებს და ძირითადად საექსპორტო მიწოდებაზე ორიენტირებულ ობიექტს წარმოადგენს.
საყურადღებოა, რომ დასახელებულ სტრატეგიულ ობიექტზე უკრაინული უპილოტო საფრენი აპარატების წინა თავდასხმა 11 ივნისს განხორციელდა.
BM.GE
წყარო: bm.ge