უნგრეთს ახალი მთავრობა ჰყავს - მადიარმა 16 მინისტრი დანიშნა

შაბათს დილით პარლამენტში ფიცის დადების შემდეგ, პეტერ მადიარი უნგრეთის ახალი პრემიერ-მინისტრი გახდა. დღეს კი მთავრობის წევრებმა შანდორის სასახლეში რესპუბლიკის პრეზიდენტ ტამაშ შუიოკისგან რწმუნებათა სიგელები მიიღეს.

ამით ვიქტორ ორბანის 16-წლიანი მმართველობა ოფიციალურად დასრულდა და აპრილში მოპოვებული დამაჯერებელი საარჩევნო გამარჯვება გამყარდა.

მთავრობის წევრებმა მინისტრებად დანიშვნის შესახებ დოკუმენტებს ხელი დღეს მოაწერეს.

მთავრობის შემადგენლობა ასეთია:

• საბოლჩ იანოშ ბონა – სოფლის მეურნეობის მინისტრი; • გაბორ პოშფაი – შინაგან საქმეთა მინისტრი; • ჟოლტ ჩაბა ჰეგედიუში – ჯანდაცვის მინისტრი; • ლასლო ატილა გაიდოში – საცხოვრებელი გარემოს დაცვის მინისტრი; • იშტვან კაპიტანი – ეკონომიკისა და ენერგეტიკის მინისტრი; • რომულუშ რუშინ-სენდი – თავდაცვის მინისტრი; • მარტა ტოროჩიკნე გოროგი – იუსტიციის მინისტრი; • დავიდ ვიტეზი – ტრანსპორტისა და ინვესტიციების მინისტრი; • ანიტა ორბანი – საგარეო საქმეთა მინისტრი; • ბალინტ გიორგი რუფი – პრემიერ-მინისტრის აპარატის ხელმძღვანელი მინისტრი; • იუდით ორშოლია ლანერტი – განათლებისა და ბავშვთა საკითხების მინისტრი; • ანდრაშ მიკლოს კარმანი – ფინანსთა მინისტრი; • ვილმოშ კატაი-ნემეტი – სოციალურ და ოჯახურ საქმეთა მინისტრი; • ზოლტან ტარი – საზოგადოებრივი ურთიერთობებისა და კულტურის მინისტრი; • ზოლტან ტანაჩი – მეცნიერებისა და ტექნოლოგიების მინისტრი; • ვიქტორია ლორინცი – სოფლისა და მუნიციპალური განვითარების მინისტრი.

შეგახსენებთ, რომ გასულ თვეს მადიარის პარტია "ტისამ" 199-ადგილიან ეროვნულ ასამბლეაში 141 მანდატი, ანუ აბსოლუტური უმრავლესობა მოიპოვა. წინა მმართველი პარტია "ფიდესი" ახალ პარლამენტში 44 მანდატით იქნება წარმოდგენილი, ორბანის ყოფილი მოკავშირე KDNP - 8-ით, ხოლო პარტია "ჩვენი სამშობლო" - 6-ით.

მადიარის პრემიერ-მინისტრის პოსტზე დანიშვნა შაბათს, ეროვნული ასამბლეის ინაუგურაციის სესიაზე დამტკიცდა. მას მხარი 140-მა დეპუტატმა დაუჭირა, 54 წინააღმდეგ წავიდა, ერთმა კი თავი შეიკავა.

ფიცის დადების შემდეგ პეტერ მადიარმა განაცხადა, რომ ხალხმა მის პარტიას მისცა მანდატი, უხელმძღვანელოს ქვეყნის ისტორიის ახალ თავს და შეცვალოს არა მხოლოდ მთავრობა, არამედ მთლიანად სისტემა.

უნგრეთის ახალმა პრემიერ-მინისტრმა ორბანის დროს დანიშნულ თანამდებობის პირებს გადადგომისკენ მოუწოდა.

"მე არ ვიბატონებ უნგრეთზე, მე ვემსახურები ჩემს სამშობლოს. თუმცა, შერიგების გარეშე ახალი დასაწყისი ვერ იარსებებს, შერიგება კი შეუძლებელია სამართლიანობის გარეშე.

უნგრული დემოკრატიის სახლიდან მოვუწოდებ იმ მაღალი თანამდებობის პირებს, რომლებიც წინა სისტემას ემსახურებოდნენ, დღესვე, ან ყველაზე გვიან 31 მაისამდე გადადგნენ. პირველმა ეს პრეზიდენტმა ტამაშ შუიოკმა უნდა გააკეთოს", - განაცხადა პეტერ მადიარმა.

მთავრობის შეცვლასთან დაკავშირებული 36-წლიანი ტრადიციისა და პროტოკოლის დარღვევით, ყოფილ პრემიერ-მინისტრ ვიქტორ ორბანს ინაუგურაციის სესიაზე სიტყვით არ მიუმართავს და პროცესს საერთოდ არ დასწრებია.