უშგულში, ლამარიას მონასტრის ტერიტორიაზე უნებართვო მშენებლობა შეჩერდა - სააგენტო

უშგულში, ლამარიას მონასტრის ტერიტორიაზე კელიების უნებართვო მშენებლობა სააგენტოს გაფრთხილების საფუძველზე შეჩერებულია. ინფორმაციას ამის შესახებ კულტურული მემკვიდრეობის დაცვის ეროვნული სააგენტო ავრცელებს.

უწყების ცნობით, უშგულში, ლამარიას მონასტრის ტერიტორიაზე სამშენებლო სამუშაოები შესაბამისი ნებართვის გარეშე ხორციელდებოდა. სააგენტოში აცხადებენ, რომ ისინი ოპერატიულად მიაწვდიან საზოგადოებას ინფორმაციას საკითხთან დაკავშირებით მიღებული შემდგომი გადაწყვეტილებების შესახებ.

კულტურული მემკვიდრეობის დაცვის ეროვნული სააგენტო შეგვახსენებს, რომ მოქმედი კანონმდებლობის თანახმად, კულტურული მემკვიდრეობის ძეგლებზე ნებისმიერი სახის სამშენებლო, სარეაბილიტაციო ან სხვა ტიპის ჩარევა სააგენტოსთან წინასწარ შეთანხმებასა და დადგენილი პროცედურების გავლას საჭიროებს.

უშგულის ლამარია, რომელიც სოფელ ჟიბიანის ზემოთ მდებარეობს, IX-X საუკუნეებით დათარიღებული კულტურული მემკვიდრეობის ძეგლია. „ჩაიხანამ“, 8 ივლისს, გამოაქვეყნა მასალა, რომლის მიხედვითაც, თანამედროვე სამშენებლო მასალით, ბლოკით სატრაპეზოები შენდება. ამის შემდეგ, კულტურული მემკვიდრეობის სააგენტომ თქვა, რომ ლამარიას მონასტრის ტერიტორიაზე კელიები უნებართვოდ შენდება და უწყებამ საკითხის შესწავლა დაიწყო.