ვანში, ყველის არალეგალური საწარმო დაჯარიმდა და ობიექტს საწარმოო პროცესი შეუჩერდა - სეს

ვანის მუნიციპალიტეტში არალეგალური ყველის საწარმო გამოვლინდა და ობიექტს საწარმოო პროცესი შეუჩერდა. ინფორმაციას სურსათის ეროვნული სააგენტო ავრცელებს.

უწყების ცნობით, იმერეთის დეპარტამენტის ინსპექტორების მიერ ჩატარებული სახელმწიფო კონტროლის შედეგად დადგინდა, რომ ფიზიკური პირი დ. დ. (ვანის მუნიციპალიტეტი, სოფ. ციხესულორი) ყველს შესაბამისი აღიარებისა და ეკონომიკურ საქმიანობათა რეესტრში რეგისტრაციის გარეშე აწარმოებდა.

შემოწმებისას ასევე გამოვლინდა ტექნოლოგიური პროცესის დარღვევით დამზადებული პროდუქცია, რომელიც შემდგომი განადგურების მიზნით დაილუქა. გარდა ამისა, ობიექტზე დარღვეული იყო მომხმარებლისთვის სურსათის შესახებ ინფორმაციის მიწოდების წესებიც.

გამოვლენილი დარღვევების გამო ბიზნესოპერატორი დაჯარიმდა და საწარმოს საქმიანობა დროებით შეუჩერდა.

სურსათის ეროვნული სააგენტო მოუწოდებს ბიზნესოპერატორებს, საქმიანობა შესაბამისი რეგულაციების დაცვით განახორციელონ და სურსათის უვნებლობის მოთხოვნები სრულად დაიცვან.

2026 წლის პირველ კვარტალში სურსათის სექტორში კრიტიკული დარღვევები მკვეთრად გაიზარდა. სურსათის ეროვნული სააგენტოს მონაცემებით, იანვარ-მარტში გამოვლინდა 288 კრიტიკული შეუსაბამობა, რაც წინა წლის ანალოგიურ პერიოდთან შედარებით (96 შემთხვევა) 200%-იანი ზრდაა. პარალელურად, გაიზარდა კონტროლის მასშტაბიც - სააგენტომ 9270 შემოწმება ჩაატარა, რაც მნიშვნელოვნად აღემატება 2025 წლის მაჩვენებელს.

ყველაზე ხშირ პრობლემებად რჩება რეგისტრაციის გარეშე საქმიანობა, ეტიკეტირების წესების დარღვევა და ვადაგასული პროდუქციის რეალიზაცია. უწყების შეფასებით, დარღვევების ზრდა ბაზარზე სისტემურ გამოწვევებზე მიუთითებს.