VASP-ების ასოციაციის საგანგებო განცხადება კომპანიების დაჯარიმების საკითხთან დაკავშირებით
ვირტუალური აქტივების მომსახურების პროვაიდერების ასოციაცია FITA საქართველოს ეროვნული ბანკის მიერ 13 კომპანიის დაჯარიმებასთან დაკავშირებით მედიაში გავრცელებულ ინფორმაციას განცხადებით ეხმაურება და განმარტავს, რომ სანქციები კომპანიებს ფულის გათეთრებასთან დაკავშირებული დარღვევებისთვის არ დაკისრებიათ.
ასოციაციის განცხადებით, მიუხედავად იმისა, რომ ეროვნულმა ბანკმა საკითხის „ტექნიკური ბუნების“ შესახებ უკვე გააკეთა განმარტება, საზოგადოების მაღალი ინტერესიდან გამომდინარე საჭიროდ მიიჩნია დამატებითი განმარტების გაკეთება.
"მიუხედავად იმისა, რომ ეროვნულმა ბანკმა უკვე მკაფიოდ განმარტა დარღვევის ტექნიკური ბუნების შესახებ, საზოგადოებისა და მომხმარებლების მაღალი ინტერესიდან გამომდინარე, გვსურს ჩვენც ავხსნათ ვირტუალური აქტივის მომსახურების პროვაიდერების (VASP) დაჯარიმებასთან დაკავშირებული რეალური ვითარება, რათა თავიდან ავიცილოთ მედიაში გავრცელებული არასწორი ინტერპრეტაციები.
მედიის ნაწილმა ეროვნული ბანკის მიერ კომპანიების დაჯარიმების ფაქტი გააშუქა სენსაციურ ჭრილში, რაც საზოგადოებას უქმნის მცდარ შთაბეჭდილებას, თითქოს აღნიშნულმა კომპანიებმა უშუალოდ „ფულის გათეთრების“ მიმართულებით გათვალისწინებული დანაშაული ჩაიდინეს ან სერიოზული ფინანსური სანქციები დაეკისრათ. დაჯარიმებულ 13 კომპანიას შორის რამდენიმე ასოციაციის წევრია.
რეალური ვითარება:
საქმე ეხება ყოველდღიურ საქმიანობაში ოპერაციულ/პროცედურულ დარღვევას. ეს არის მუდმივი სამუშაო პროცესი და მკაცრი ვადები, კერძოდ:
ფულის გათეთრებისა და ტერორიზმის დაფინანსების აღსაკვეთად, სექტორსა და ზედამხედველს (ფინანსური მონიტორინგის სამსახური) შორის მოქმედებს უწყვეტ რეჟიმში მომუშავე საკომუნიკაციო არხები. პროცედურის მიხედვით, ზედამხედველისგან კონკრეტული მონაცემების გამოთხოვის შემთხვევაში, კომპანიებს ეძლევათ კანონმდებლობით დადგენილი ვადა (2 დღე) საპასუხო ინფორმაციის მისაწოდებლად. ეს არის ჩვეულებრივი, ყოველდღიური სამუშაო რეჟიმი.